Ոստիկանները ծեծի են ենթարկել փաստաբան Ավագ Լալայանին (տեսանյութ)

16:19, 21 ապրիլի, 2018

Երեկ՝ կեսգիշերից քիչ պակաս, Երևանի Սիլիկյան-Շիրազ փողոցների խաչմերուկում ոստիկանները՝ շուրջ 8 հոգով, բռնություն են կիրառել փաստաբան Ավագ Լալայանի նկատմամբ, երբ վերջինը տուն վերադառնալիս է եղել: Ծեծը շարունակվել է անգամ այն ժամանակ, երբ վերջինը բղավել է՝ փաստաբան եմ: Այս մասին «Հետք»ին հաղորդեց ինքը՝ փաստաբան Լալայանը, ով արդեն ՀՔԾ-ում հաղորդում է ներկայացրել հանցագործության մասին: Այժմ Ավագ Լալայանը գլխի ցավեր ունի, այսօր գնում էր դատական բժշկի մոտ:

«Տուն վերադառնալիս տեսա, որ Սիլիկյան-Շիրազ փողոցների խաչմերուկում երկու ոստիկան մի երիտասարդի քաշելով փորձում էին մտցնել մեքենան»,-պատմեց փաստաբանը:

Ավագ Լալայանը փորձել է պարզել՝ արդյոք ոստիկանները որևէ օրինական պահանջ ներկայացրել են, թե ոչ, պարզել են անչափահաս են, թե՝ ոչ, եթե անչափահաս են, զգուշացրել են, որ օրինական ներկայացուցչի ներկայության իրավունք ունի: Բայց ապարդյուն. «Հարցերիս չէին պատասխանում: Մեկ էլ նրանցից մեկը, թե՝ գնա ստեղից, արա՛»: Դրանից հետո սկսվել է ծեծը: Եվ միայն Մաշտոցի բաժնի պետի միջամտությամբ է դադարեցվել բռնությունը: Այնուհետև Ավագ Լալայանը պատմեց, որ շոկային վիճակում միացրել է հեռախոսը, սկսել նկարել, բայց ոստիկանները սկզբում չեն արձագանքել, հետո նրանցից մեկը փորձել է խլել հեռախոսը և միայն բաժնի պետի միջամտությամբ չի կարողացել: