Երեքշաբթի, 16 հուլիսի

Ֆրանսիայի Վալանս քաղաքում կբացվի նոր, ամբողջովին հիմնանորոգված հայկական դպրոց



Հոկտեմբերի 5-ին սփյուռքի նախարար Մխիթար Հայրապետյանն ընդունել է Ֆրանսիայի Վալանս քաղաքի քաղաքապետ Նիկոլա Դարագոնի գլխավորած պատվիրակությանը, որի կազմում էին քաղաքապետի տեղակալ Ֆրանկ Դիրաձոնյանը, քաղաքապետարանի աշխատակզմի ղեկավար Մաթիո Մարիենը, մունիցիպալ խորհրդի անդամներ Ժորժ Ռաստկլանը, Նաթալի Իլիոզերը, «Ռոման Ագլո»-ի նախագահ Սիլվիան Ֆիդենտին, ՀԲԸՄ Վալանսի մասնաճյուղի նախագահ Կևին Մարկարյանը, «Ապրիլի 24 կոմիտե»-ի նախագահ Գրիգոր Ամիրզայանը:  

Ողջունելով հյուրերին՝ սփյուռքի նախարարը կարևորել է Ֆրանսիայի ու  Հայաստանի միջև գործակցությունը՝ ընդգծելով, որ Վալանսում այս պահին բնակվում է 15 000 հայ: Նախարար Մխիթար Հայրապետյանը հանդիպման ընթացքում հույս է հայտնել, որ նախարարության ու Վալանսի քաղաքապետարանի միջև գործակցությունը կշարունակվի, կընդլայնվի ու  կդառնա առավել ակտիվ:

«Իսկապես Վալանսի հայկական համայնքը կարևորագույներից է Ֆրանսիայում, կցանկանամ, որ հետագա հանդիպումները լինեն աշխատանքային, որպեսզի կարողանանք պայմանավորվել հստակ ծրագրերի շուրջ», - շեշտել է նախարարը:  

Վալանսի քաղաքապետն էլ իր հերթին ընդգծել է, որ պատրաստվում են գործակցել ոչ միայն Հայաստանի Հանրապետության, այլև Արցախի Հանրապետության քաղաքների հետ: Նիկոլա Դարագոնը շեշտել է, որ  առաջիկա օրերին կայցելի նաև Արցախ՝ միաժամանակ նշելով, որ Վալանս քաղաքի կառավարման խորհրդի անդամների 10 տոկոսը հայ է:

«Պարո՛ն նախարար, շնորհակալ եմ, որ Ձեր լարված գրաֆիկում տեղ գտաք նաև մեզ համար: Ցանկանում եմ առանձնակի ընդգծել, որ Հայաստանի ու Ֆրանսիայի հարաբերությունները գտնվում են ամենաբարձր մակարդակի վրա: Ցանկանում եմ Ձեզ հրավիրել Վալանս, որպեսզի կարողանանք քննարկել գործակցության բոլոր այն ճյուղերը, որոնք կարևոր են Հայաստանի համար», - նշել է Վալանսի քաղաքապետը:

Նիկոլա Դարագոնը ընդգծել է նաև, որ 2019 թվականին քաղաքում կբացի նոր, ամբողջովին հիմնանորոգված հայկական դպրոց:

Հիշեցնենք, որ Վալանսում հայերը սկսել են հաստատվել 1923-1925 թվականներից սկսած: 1984 թվականին Վալանսում բնակվում էր 5 հազար հայ։ Նրանց թիվն այս պահին հասնում է 15 հազարի:  Վալանսում գործում են ՀԲԸՄ (1934 թվականից), Հայ Կարմիր խաչի, Մալաթիո կրթասիրաց ընկերության, Ֆրանսահայ մշակութային միության, Ֆրանսահայ երիտասարդական միության (ԺԱՖ) Վալանսի մասնաճյուղերը, ինչպես նաև այլ հասարակական, հայրենասիրական կազմակերպություններ։


Գլխավոր էջ



Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ
Ամենա

Մեկնաբանված

Կարդացված