Կիրակի, 18 օգոստոսի

ԲՀԿ-ն և ՀՅԴ-ն ներկայացնող նախարարներն ու մարզպետները կազատվեն աշխատանքից



Խորհրդարանի կողմից ԱԺ կանոնակարգ օրենքում փոփոխությունների ընդունումից հետո վարչապետ Նիկոլ Փաշինյանը հանրահավաք հրավիրեց Բաղրամյան պողոոտայում՝ Գիտությունների ազգային ակադեմիայի դիմաց:

Նշենք, որ ԱԺ կանոնակարգ օրենքում կատարված փոփոխությունները թույլ կտան ընդհատել նիստը արտակարգ իրավիճակներում կամ այն դեպքերում, երբ խոչընդոտվում է պատգամավորների քվեարկությունը, և շարունակվել այն ժամանակ, երբ խոչընդոտող հանգամանքները կվերացվեն: 

Ելույթից առաջ վարչապետը հայտնեց, որ խորհրդարանական միակ խմբակցությունը, որից ոչ մի ներկայացուցիչ օրենքի նախագծին կողմ չի քվեարկել, «Ելք»-ն է, իսկ օրինագծին կողմ քվեարկած պատգամավորներին և քաղաքական ուժերին Նիկոլ Փաշինյանը անվանեց հակահեղափոխական: Ըստ վարչապետի՝ այս փոփոխություններով արհեստական խոչընդոտ է ստեղծվում Ազգային ժողովի լուծարման և արտահերթ խորհրդարանական ընտրությունների անցկացման համար, որոնք վարչապետի այսօրվա հայտարարության համաձայն` պետք է տեղի ունենան այս տարվա նոյեմբերի վերջին կամ դեկտեմբերի սկզբին:

Նիկոլ Փաշինյանը ելույթի սկզբում հայտնեց, որ հրահանգել է ստորագրման պատրաստել «Բարգավաճ Հայաստան» և  «Հայ հեղափոխական դաշնակցություն» կուսակցությունները ներկայացնող նախարարների աշխատանքից ազատման դիմումները.

«Երեկ և այսօր Հանրապետական, ԲՀԿ և ՀՅԴ կուսակցությունների կողմից ներկայացվել է մի խայտառակ օրինագիծ, որի նպատակը Հայաստանում հակահեղափոխություն իրականացնելն է: Այդ նախագծի ընդունումը դավադրություն է Հայաստանի բարձրագույն իշխանության, այսինքն՝ հայ ժողովրդի նկատմամբ: Ես, այդ որոշման մասին իմանալով իմ աշխատակազմից, հրահանգել եմ ստորագրման պատրաստել «Բարգավաճ Հայաստան» և  «Հայ հեղափոխական դաշնակցություն» կուսակցությունները ներկայացնող նախարարների աշխատանքից ազատման դիմումները: «Ծառուկյան» դաշինքը և ՀՅԴ-ն ներկայացնող մարզպետները աշխատանքից կազատվեն կառավարության առաջիկա նիստին, և նրանք բոլորը, ըստ էության, այս պահից համարվում են ազատված»,- հայտարարեց Նիկոլ Փաշինյանը:

Որոշ ժամանակ անց վարչապետ Փաշինյանի հենց տեղում կատարված գրությամբ նախագահին առաջարկվել է աշխատանքից ազատել արտակարգ իրավիճակների նախարար Հրաչյա Ռոստոմյանին, տնտեսական զարգացման և ներդրումների նախարար Արծվիկ Մինասյանին, էներգետիկ ենթակառուցվածքների և բնական պաշարների նախարար Արթուր Գրիգորյանին, սպորտի և երիտասարդության հարցերով նախարար Լևոն Վահրադյանին, տրանսպորտի, կապի և տեղեկատվական տեխնոլոգիաների նախարար Աշոտ Հակոբյանին և գյուղատնտեսության նախարար Արթուր Խաչատրյանին:

Գործադիրի ղեկավարը հայտնեց, որ ԲՀԿ-ն ներկայացնող փոխվարչապետ Մհեր Գրիգորյանը ցանկություն է հայտնել մնալ և շարունակել աշխատանքը կառավարությունում, ինչը ողջունվեց վարչապետի կողմից:


Գլխավոր էջ



Մեկնաբանություններ (1)
1. Արամ05:22 - 3 հոկտեմբերի, 2018
Քանի դեռ գոյություն ունի ԲՀԿ կոչվող ընդհատակյա կառույցը, որը կուսակցության դիմակի տակ ներթափանցում է ամենուր ԱԺ, կառավարություն , ՏԻՄ, քաղաքական ցնցումներից ու ճգնաժամերից հնարավոր չէ զերձ մնալ։ Այն հատուկ ստեղծված է Քոչարյանի կողմից, ղեկավարվում է նրա կողմից և Ծառուկյանը հլու հնազանդ կատարում է նրա ինստրուկցիաները։ Եվ որպես կանոն նա միշտ բացակայում է ԱԺ տեղի ունեցող ոչ սովորական անցուդարձերից։ Վաուց հասունացել է ոչ միայն Քոչարյանին, այլ նրա թարախային մետաստազներին վնասազերձելու հարցը։ Ինչ է նշանակում Գագիկ Ծառուկյան բիզնեսմեն կամ բարեգործ երբ նրա ողջ ունեցոածքի 80-90% պատկանում է Ռ․ Քոչարյանին և տասնյակ տարիներ նա չի մուծել ոչ միայն հարկերի ճնշող մասը, այլ նաև ջրի էլ․ հոսանքի գազի վարձերը։ Այն սարը որը նա վեր է ածել սեփական կալվածքի հանդիսանում է միջազգային գեոդեզիական ցանցի կարևոր տրիանգուլացիոն կետորից մեկ իր հատուկ համարանիշով։ Ոչ ոք Ծառուկյանին չի ասել, որ նա իրավունք չունի սարը սեփականացնելու և առավել ևս այն կառուցապատելու։Արժե հիշել հայտնի «աղվեսի ու կկվի» մասին բանաստեղծության տողերը․ «Ով է տվել են լրբին սար, սարը ամենքին է հավասար»։Հարկ է նշել նաև, որ այդ սարն ամբողջությամբ մշակվում կանաչապատվում, ծառատնկվում է Երևան մտնող խմելու ջրատարից և լիովին անվճար։ Սարը յուրացնելուց հետո շրջակա բոլոր գյուղերը գրեթե զրկվել են նորմալ ջրամատակարարումից։ Չեմ կարծում, որ «Երևան ջուրը» սրանից անտեղյակ է։
Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ
Ամենա

Մեկնաբանված

Կարդացված