Հինգշաբթի, 22 օգոստոսի

«Զինված խմբի» գործով կալանքի տակ մնաց միայն կազմակերպիչ համարվող Արթուր Վարդանյանը



Երևան քաղաքի ընդհանուր իրավասության դատարանը, նախագահությամբ դատավոր Արմեն Բեկթաշյանի, այսօր մերժեց «զինված խմբի» գործով ամբաստանյալ Արթուր Վարդանյանի խափանման միջոց կալանքը 1 մլն դրամ գրավով փոխարինելու վերաբերյալ միջնորդությունը: Սեպտեմբերի 28-ին նման միջնորդություն էին ներկայացրել Վարդանյանի պաշտպանները, և դատարանը հեռացել էր խորհրդակցական սենյակ՝ որոշում կայացնելու:

Սեպտեմբերի 28-ին դատարանը որոշել էր մեկ այլ ամբաստանյալ Գևորգ Ջնդոյանի կալանքը փոխարինել նույն չափի՝ մեկ միլիոն դրամ գրավով: Ջնդոյանի պաշտպան Արմինե Ֆանյանից տեղեկացանք, որ սեպտեմբերի 30-ին՝ գրավի գումարը վճարելուց հետո, Ջնդոյանն ազատ է արձակվել:

Այսպիսով՝ այս գործով անցնող անձանցից կալանքի տակ մնաց միայն Վարդանյանը: Կալանքի տակ գտնվող մյուս ամբաստանյալները վերջին չորս ամիսների ընթացքում ազատ են արձակվել:

Հիշեցնենք, որ 2015-ի նոյեմբերի 25-ին ԱԱԾ-ն հայտարարություն տարածեց այն մասին, որ Նորքում վնասազերծվել է զինված խումբ:

Ըստ գործի՝ Արթուր Վարդանյանին մեղադրանք է առաջադրվել այն բանի համար, որ նա, 2015թ. ապրիլից գտնվելով Հայաստանի Հանրապետության տարածքում, ստեղծել ու ղեկավարել է ՀՀ քաղաքացիներից կազմված հանցավոր համագործակցություն, կազմակերպված խմբի կազմում ապօրինի կերպով ձեռք է բերել, պահել, փոխադրել և կրել մեծ քանակությամբ զենք, ռազմամթերք, պայթուցիկ նյութեր, պայթուցիկ սարքեր` նպատակ ունենալով Հայաստանի Հանրապետությունում իշխանությունը յուրացնել, այսինքն` զավթել` բռնություն գործադրելու կամ բռնություն գործադրելու սպառնալիքով, ինչը ավարտին չի հասցվել նրա կամքից անկախ հանգամանքներում, քանի որ հանցավոր համագործակցության մեջ ներգրավված անձինք բացահայտվել ու 2015թ. նոյեմբերի 25-ին վնասազերծվել են Հայաստանի Հանրապետության ազգային անվտանգության ծառայության աշխատակիցների կողմից:


Գլխավոր էջ


Տես նաև՝

ավելին



Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ
Ամենա

Մեկնաբանված

Կարդացված