Երեքշաբթի, 20 օգոստոսի

Երեւանի քաղաքապետի թեկնածու Հայկ Մարությանի չեխական անշարժ գույքը


«Հետքը» գրել էր Երեւանի ավագանու ընտրություններում քաղաքապետի թեկնածուների ունեցվածքի մասին, ինչից պարզ է դառնում, որ «Իմ քայլը» դաշինքի թեկնածու Հայկ Մարությանը ոչ միայն ամենահարուստն է (ըստ հայտարարագրերի), այլեւ միակ թեկնածուն, որ արտերկրում անշարժ գույք ունի:

Չնայած Հ. Մարությանը հաշվառված է Հյուսիսային պողոտայում, որտեղ 170 քմ մակերեսով բնակարան ունի եւ 27 քմ տարածքով ավտոտնակ, փաստացի բնակվում է Հանրապետության փողոցում:

Բացի Հյուսիսային պողոտայում ունեցած գույքից՝ Հ. Մարությանը, ըստ հայտարարագրի, նաեւ Չեխիայի մայրաքաղաք Պրահայում 5 բնակարան ունի, 1 առանձնատուն եւ 2 հողամաս: Սրանցից մի քանիսը նրա սեփականությունն են, մյուսները՝ համատեղ սեփականություն կնոջ՝ Իվա Մարությանի հետ, որը Չեխիայի քաղաքացի է:

Թեկնածուի հայտարարագրից նաեւ տեղեկանում ենք, որ նա իր չեխական բնակարանները վերջին մեկ տարում (2017-ի օգոստոսից մինչեւ 2018-ի օգոստոս. հայտարարագիրը ներակայացվել է այս ժամանակահատվածի համար) վարձով տվել է տեղացիների, ինչի արդյունքում ստացել է 1.338.000 չեխական կրոնի եկամուտ (շուրջ 30 մլն դրամ):

Քարտեզին նայելով՝ կարելի է տեսնել, որ Մարությանի՝ Պրահայում գտնվող տները հետաքրքիր ձեւով դասավորվել են մի գծի վրա:

Այժմ անդրադառնանք դրանց ըստ հերթականության:

Լիբեն թաղամասի Կրեյչիհո 2279/6 հասցեում (Krejčího 2279/6, Libeň, Praha 8) Հ. Մարությանն, ըստ հայտարարագրի, 63 քմ մակերեսով բնակարան ունի, ինչպես նաեւ 45 քմ տարածքով հողամաս: Այս փաստը հաստատվում է նաեւ չեխական կադաստրի փաստաթղթերով:

Երեւանի քաղաքապետի թեկնածուի ամբողջ գույքը գտնվում է Վլտավա գետի աջ ափին ու համեմատաբար հեռու է Պրահայի կենտրոնից, սակայն վերը նշված շենքը (տես ստորեւ՝ նկարում) դրանցից համեմատաբար ամենամոտն է Հին քաղաքին:

Այս շենքից ընդամենը 550 մ հեռավորության վրա Հայկ Մարությանը 2 բնակարան ունի նույն Լիբեն թաղամասի Վ Զահրադախ 2406 հասցեում (V zahradách 2406. հստակ չէ, թե իրար կից 2406/37 եւ 2406/39 շենքերից կոնկրետ որտեղ են բնակարանները): Ըստ հայտարարագրի՝ բնակարաններից մեկի մակերեսը 73 քմ է, մյուսինը՝ 59 քմ: Սրանք նույնպես Մարությանի միանձնյա սեփականությունն են:

Հայկ Մարությանը կնոջ հետ համատեղ սեփականությամբ 55 քմ մակերեսով բնակարան ունի Լետնյանի թաղամասի Տերեզինսկա 702/7 շենքում (Terezínská 702/7, Letňany, Praha 18): Լետնյանին համարվում է Պրահայի ամենահարուստ շրջաններից մեկը: Քաղաքապետի թեկնածուի եւ նրա կնոջ վերաբերյալ կադաստրային թղթերում իբրեւ գրանցման հասցե նշվում է հենց Տերեզինսկա 702/7-ը: Այսինքն՝ սա Մարությանների չեխական հիմնական հասցեն է:

Հայկ եւ Իվա Մարությանները եւս մեկ համատեղ բնակարան ունեն Կբելի թաղամասի Հերլիկովիցկա 1021 հասցեում (Herlíkovická 1021, Kbely, Praha 19. քանի որ 1021 հասցեի տակ իրար կից մի քանի շենք կա (տես ստորեւ՝ նկարում), դժվար է ասել, թե կոնկրետ որտեղ է Մարությանների բնակարանը): Ըստ հայտարարագրի՝ դրա մակերեսը 60 քմ է:

Չնայած թեկնածուն Հերլիկովիցկա 1021-ում հայտարարագրել է միայն կնոջ հետ համատեղ բնակարանը, չեխական կադաստրում տեսնում ենք, որ Հ. Մարությանը եւս մի գույք ունի այս հասցեում, որը նրա միանձնյա սեփականությունն է (տես ստորեւ): 

Մարության ամուսինները համատեղ սեփականությամբ նաեւ առանձնատուն ու հողամաս ունեն Պրահայի ծայրամասում՝ Վինորժ թաղամասի Լիպոլտիցկա 807/15 հասցեում (Lipoltická 807/15, Vinoř,  Praha 19):

Ըստ Հ. Մարությանի հայտարարագրի՝ տան մակերեսը 178 քմ է, սակայն կադաստրի տվյալներով՝ այն 78 քմ է: Քանի որ առանձնատունը երկհարկանի է, չի բացառվում, որ թեկնածուն ներկայացրել է ընդհանուր մակերեսը: Տունը նաեւ կիսանկուղային ավտոտնակ ունի:

Առանձնատան հարեւանությամբ, ինչպես կարելի է տեսնել վերեւի եռաչափ նկարում, 356 քմ մակերեսով հողամաս կա, որի տարածքը, սակայն, Հ. Մարությանը ներակայացրել է 434 քմ (ներառել է նաեւ առանձնատան 78 քմ հողը):

Չնայած 2011-ին արված եռաչափ պատկերում երեւում է, որ հողատարածքն անմշակ է, հետագայում դրա տեսքը փոխվել է (տես ստորեւ):


Գլխավոր էջ


Տես նաև՝

ավելին

Մեկնաբանություններ (9)
1. Հակոբ11:30 - 17 սեպտեմբերի, 2018
Ապրի, շատ ապրի, հալալ քրտինքով ունեցվածք է, եւ շատ լավ է ... որ արդեն ունի .... չնայած քիչ էլ զարմանալի է: Բոլոր դեպքերում կեցցե «Հետքը»!
2. Լուսիկ՝ Հայկ Մարությանի կողմնակից13:30 - 17 սեպտեմբերի, 2018
"Հետքը" երկար տարիներր զբաղվում է մեր պաշտոնյաների կողմից գնած չափազանց մեծ արտասահմանյան անշարժ գույքով՝ Գագիկ Խաչատրյան, Արմեն Գևորգյան, Խոսրով Հարությունյան... Չեմ հիշում, որ այդ հրապարակումները որևէ արձագանքի արժանանաին իրավապահների, այլ լրատվամիջոցների կողմից: Բայց Հայկի սեփական քրտինքով ձեռք բերած գույքի մասին հրապարակումն արդեն հայտնվել է այլ կայքերում և, հնարավոր է, շահարկվի իր մրցակիսների կողմից: Կարծում եմ "Հետքի" նպատակն եղել է ապահովագրել Հայկին հետագա շահարկումներից, երբ նա ընտրվի քաղաքապետ:
3. Հովանես Արափշյան, (Նյու Յորք)04:20 - 18 սեպտեմբերի, 2018
Կեցցես Հայկ, դա քո քրտնաջան աշխատանքի արդյունքն է, դու չես գողացել աշխատել ես. Համեմատեք այդ բնակարանները Երեվանում օլիգարխների թալանած փողերով ՊԱԼԱՏՆԵՐԻ հետ
4. մարդամեկ15:24 - 18 սեպտեմբերի, 2018
մարդիք տներ էն առնում , իսկ դուք մի երկու հատ բնակարանը շատ եք համարում․ Ծիծաղելի է, ուրիշ ???
5. Բարով վայելես, շնորհալի Հայկ23:02 - 18 սեպտեմբերի, 2018
Կեցցե՛ս, շնորհալի Հայկ, դա քո արդար ու քրտնաջան աշխատանքի արդյունքն է: Դու շատ ավելին ունենալու արժանի հայորդի ես: Ի սրտե մաղթանքս է, որ առողջ մնաս, բարով վայելես և երրջանիկ լինես:
6. Հ.Շ.22:58 - 19 սեպտեմբերի, 2018
խնդիրը այն չէ որ մարդը հարստացել է, իրոք հալալ լինի իրեն … այլ, թէ նա հարստացել է, փաստօրէն այդ ալ կանուխ տարիքին, նախկին վարչակարգերու օրերուն, ծայրագոյն «Սեւ»երի իշխանութեանց ներքոյ … հետեւաբար, այն յեղափոխական հանկերգը թէ նախկին չար իշխանաւորները առիթ չէին տար որ իրենց անմիջական շրջապատից դուրս ոեւէ մէկը հարստանա, դա իրաւ չէ, եւ այս Մարութեանը կենդանի փաստն է որ դա իրաւ չէ … միւս կողմէն, նա հարստացել է նախկին վարչակարգերի օրոք, հետեւաբար, գոնէ՝ բաւարար յօլա գացած է անոնց հետ, որպէսզի իրեն թոյլ տան որ այդպէս ու ադքան, այդքան արագօրէն, փող եւ ինչքեր դիզէ …ուրեմն ինչի՞ս «յեղափոխականն է», նա ! … ուրիշ մէկը չէի՞ն կրնար գտնել որ Փաշինեանին տեղակալը լինի մայրաքաղաքի Քաղաքապետարանումնությունը...
7. Կներեք իհարկե00:26 - 20 սեպտեմբերի, 2018
Հարգարժան տիար Հ.Շ., բայց դուք ձեր գրածից բան հասկանում ե՞ք: Ո՛չ արևմտահայերեն է, ո՛չ էլ արևելահայերեն: Իմաստային առումով էլ ձեր գրածը մեղմ ասած անհեթեթություն է: Կներեք իհարկե, ձեր անձն վիրավորելու բնավ նպատակ չունեմ:
8. Տիգրան12:48 - 20 սեպտեմբերի, 2018
Հարգելի խմբագրություն, իսկ կարող ե՞ք տեղեկություն հաղորդել, թե ով ինչքան հարկ է վճարել իր եկամուտներից:
9. առանց դուխի19:29 - 21 սեպտեմբերի, 2018
Դե Կառան ՀՀԿ ից չէ՝, հետևաբար իր քրտինքն է....
Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։