Կիրակի, 17 նոյեմբերի

Շուշիի բանտում գտնվող լեյտենանտին տեղափոխել են Երևան



Փաստաբանը հույս ունի՝ լեյտենանտը տուն կգնա Վերաքննիչ դատարանի որոշումից հետո

Զինվորի առողջությանը թեթև վնասի հատկանիշներ չպարունակող մարմնական վնասվածք պատճառելու համար 2 տարի 6 ամսվա ազատազրկման դատապարտված լեյտենանտ Արամ Աղայանին Շուշիի բերդից երկու օր առաջ տեղափոխել են Երևան: Այժմ նա գտնվում է «Նուբարաշեն» ՔԿՀ-ում: Այս մասին «Հետքին» փոխանցեց Աղայանի պաշտպան Արայիկ Պապիկյանը:

Հիշեցնենք, որ Վերաքննիչ դատարանում առաջին նիստը նշանակված էր դեռևս հունվարի 16-ին, երբ լեյտենանտին էտապավորելու հարցը չէր լուծվել, ու բողոքի լսումը անորոշ ժամանակով հետաձգվել էր:

Երեկ փաստաբան Արայիկ Պապիկյանը Վերաքննիչ դատարանին տեղեկացրել է, որ Արամ Աղայանն արդեն Երևանում է, և կարող են նիստ նշանակել:

«Գրեթե 3 ամիս այս գործով չէին կարողանում նիստ հրավիրել Արամի էտապավորման հարցի հետ կապված»,-ասաց պաշտպան Պապիկյանը:

Այն, որ էտապավորման հարցը վերջապես լուծվեց, ըստ Արայիկ Պապիկյանի, նաև հանրային հնչեղության շնորհիվ էր. «Կարծում եմ՝ հանրային հսկողությունն ավելի մեծ դեր խաղաց, չնայած իրավական ընթացակարգեր գոյություն ունեն: Չեմ կարծում, որ 3 ամիս ժամանակ էր պետք, որ Արամ Աղայանին մի ՔԿՀ-ից տեղափոխեին Երևանի ՔԿՀ»: Մի քանի օր առաջ Արայիկ Պապիկյանը նաև ֆեյսբուքյան գրառում էր կատարել Արամ Աղայանի էտապավորման հարցը ձգձգելու մասին:

Պաշտպանը երեկ է տեսակցել Արամին, ունեցել առաձնազրույց, Արամ Աղայանը նշել է, որ ամեն բան նորմալ է, բողոքներ չունի: Այսօր լեյտենանտը տեսակցել է նաև ընտանիքի անդամների հետ:

Մինչև Վերաքննիչ դատարանի քննության ավարտը Արամ Աղայանը, ըստ պաշտպանի, կմնա «Նուբարաշեն» ՔԿՀ-ում: Իսկ Վերաքննիչ դատարանի դատական ակտից հետո, փաստաբանի կարծիքով, Արամ Աղայանը տուն կգնա:

«Հետքն» անդրադարձել է լեյտենանտի կալանավորմանը, մեղադրանքին, Սյունիքի մարզի ընդհանուր իրավասության դատարանի դատավճռին, փաստաբանի նշած խախտումներին ու Վերաքննիչ բողոքին: Հիշեցնենք, որ Արամ Աղայանը դատապարտվել է 2 տարի 6 ամսվա ազատազրկման զինվոր Ռուդիկ Գրիգորյանին առողջության թեթև վնասի հատկանիշներ չպարունակող մարմնական վնասվածք պատճառելու համար: Սակայն, հատկանշական է, որ Գրիգորյանը որևէ բողոք չունի Աղայանի դեմ, հակառակը՝ «Հետքի» հետ զույցում ավագ Գիրգորյանը՝ Ռուդիկի հայրը, նշեց. «Չունենք որևէ խնդիր, բողոք, պարտք ու պահանջ Արամի հանդեպ: Իմ տղան էլ շեշտեց դատարանում, որ մտերիմ են եղել»:


Գլխավոր էջ



Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ
Ամենա

Մեկնաբանված

Կարդացված