ՈՒրբաթ, 15 նոյեմբերի

46 տուժած ոստիկաններից որևէ մեկը չէր ներկայացել դատարան



Հուլիսի 20-ին Խորենացի փողոցում տուժած 46 ոստիկաններից և ոչ մեկն այսօր չէր ներկայացել դատական նիստին:

«Երևի հիմա էլ ընկած տուժող են փնտրում, չեն գտնում»,- ասացին երեք մեղադրյալ երիտասարդների հարազատները՝ լսելով Էրեբունի և Նուբարաշեն վարչական շրջանների առաջին ատյանի դատավոր Արտուշ Գաբրիելյանի որոշումը՝ գործը Կենտրոն և Նորք-Մարաշ դատարան ուղարկելու մասին:

«Մի երկու շաբաթ էլ կպահանջվի, որ Կենտրոնի դատարանում նիստ նշանակեն, իսկ մեր երեխաները շարունակում են կալանքի տակ մնալ»,- ասացին մեղադրյալների բարեկամները: 

Գործի քննությունը տեղափոխվեց Կենտրոնի դատարան, քանի որ դատավորը ստացել էր Կենտրոն վարչական շրջանի ղեկավարի գրությունն այն մասին, որ Խորենացի և Քրիստափոր փողոցների խաչմերուկի հատվածը Կենտրոն վարչական դատարանի վարչական տարածքում է: Թեպետ դատախազը նշեց, որ միևնույնն է տարածքը սպասարկում են Էրեբունու իրավապահները, իսկ պաշտպանները կարծիք հայտնեցին, որ իրենց պաշտպանյալները անհարկի ևս մի քանի շաբաթ կալանքի տակ են մնալու, այդուհանդերձ գործի քննությունը տեղափոխվեց: 

Հիշեցնենք, որ ըստ մեղադրանքի` երեք երիտասարդներ՝ Սոսո Մարգարյանը, Գագիկ Միքայելյանը և Արսեն Մկրտումնյանը հուլիսի 20-ին Խորենացի փողոցում տեղի ունեցած բողոքի ակցիայի ժամանակ կատարել են զանգվածային անկարգություններ, վնասել 46 ոստիկանի ու պատճառել ավելի քան 9 մլն դրամի գույքային վնաս: Երեքն էլ մեղադրվում են ՔՕ 225 հոդվածի 2–րդ մասով՝ զանգվածային անկարգությունների կատարում, որի համար նախատեսված է 3-8 տարվա ազատազրկում: Երիտասարդներն արդեն երկու ամսից ավելի գտնվում են կալանքի տակ «Նուբարաշեն» ՔԿՀ-ում:   

Պատմության ուսուցիչը՝ բանտում

Մեղադրյալներից Գագիկ Միքայելյանի պաշտպան Արայիկ Զալյանը նշեց, որ նախաքննական մարմինը մի տեսանյութ է ներկայացրել լրատվամիջոցներից, որտեղ  երևում է, որ իր պաշտպանյալը ինչ-որ իր է նետում. «Բայց 46-ից և որևէ մեկը չկա, որ պարզված լինի, թե տուժել է իմ պաշտպանյալի գործողության հետևանքով: Քար նետելը քրեական հանցագործություն չի, թե չունենք պարզված հանգամանք՝ ինչ վնաս է հասցվել կոնկրետ անձի»,- ասաց պաշտպանը:

Գագիկ Միքայելյանի մայր Անահիտ Պողոսյանը պատմեց, որ որդին 32 տարեկան է, ամուսնացած է, ունի մեկ աղջիկ, շուտով կդառնա 2 տարեկան, մանկավարժ է. 142 ավագ դպրոցում աշխատում է որպես պատմության ուսուցիչ, աշխատել է նաև ԳԱԱ պատմության ինստիտուտում: Ապրիլյան դեպքերին որպես կամավոր մեկնել է, Ջեբրայիլում է եղել. «Նորմալ քաղաքացիներին բանտարկում են, հանցագործներին թողնում դրսում: Իշխանությանը ստրկամիտ քաղաքացիներ են պետք, որ հեշտ կառավարեն, իսկ իմ տղայի պես ազնիվ, խելացի մարդիկ բանտում լինեն»,- ասում է Գագիկի մայրը:

Տիկին Անահիտը պատմում է, որ տղային ծանոթ մարդու միջոցով են տնից հանել տարել. «Էլ մենք իրեն չենք տեսել, սկզբում ասել են մի 2 ժամից կթողնենք, հետո 2 օրից ու էդպես մինչ օրս»: Մայրն ասում է, որ ցույցի ժամանակ որդին ևս վնասվածք է ստացել, սակայն որևէ քննություն չի գնացել այդ մասով, որդին տուժող չի ճանաչվել:

Իսկ հիմա ասում է, որ ուտելիք են տանում բանտ. «ու վերջ, ոչ տեսնում ենք, ոչ զրուցում ենք, միայն փաստաբանների միջոցով»:

Իշխան Մարգարյան. «Տուժողը իմ որդին է ու մեր ընտանիքը»

23-ամյա Սոսո Մարգարյանն ինքն է տուժել հուլիսի 20-ին, վնասվել է ոտքը: Նրա հայրը՝ Իշխան Մարգարյանն ասում է, որ մի բեկորն ինքնըստինքյան դուրս է եկել, մյուսը դեռ ոտքի մեջ է, որ որդին բժշկական օգնություն մինչ օրս չի ստացել:

Մարգարյանների ընտանիքը որևէ ակնկալիք դատարանից չունի, ավելին՝ պարոն Իշխանի կարծիքով, Հայստանում արդարադատություն չկա, սպասում են հրահանգի:

Երկու ամսից ավելի անազատության մեջ գտնվող Սոսո Մարգարյանն ավարտել է Հայ-ռուսական Սլավոնական համալսարանը, այժմ սովորում է Բժշկական համալսարանում, սպորտով է զբաղվում, ճապոներեն ուսումնասիրում:

Տուժողների ու մեղադրյալների տեղերը փոխված են

Այս գործով Արսեն Մկրտումյանի բազմազավակ ընտանիքը գտնում է, որ տուժողների ու մեղադրյալների տեղեր փոխված են:

«Մենք 70 օր սթրեսի մեջ ենք, վիճակն էլ դատարանում տեսանք՝ նիհարած»,- ասացին Արսենի եղբայրները,- մենք ենք «Նուբարաշեն» ուտելիք տանում. խոզի կեր են տալիս, ով չգիտի, որ բանտի սնունդը ուտելու չի»:

Նրանք պատմեցին, որ 2 օր փնտրել են Արսենին որպես անհայտ կորած, իրենց չեն զգուշացրել իրավապահները, որ Արսենը ՁՊՎ-ում է:

Լևոն Մկրտումյանը՝ Արսեն Մկրտումյանի հայրն ասաց, որ տան խուզարկությունը իրականացվել է առանց դատարանի որոշման. «Մի հարևան բերեցին, թե տես շորերը տանում ենք»:

Արսեն Մկրտումյանի հայրը պատմեց, որ որդին դասակի հրամանատար է եղել, երկու տարի առաջ է զորացրվել, գերազանց ծառայանության համար պարգևատրվել է:

Արսեն Մկրտումյանի պաշտպան Արա Կարագյոզյանը տեղեկացրեց, որ վաղը գրավի միջնորդություն է ներկայացնելու Կենտրոնի դատարան:


Գլխավոր էջ



Մեկնաբանություններ (4)
1. lusik17:47 - 30 սեպտեմբերի, 2016
Այս երեքը երևի գերբնական ուժի, ճարպկության տեր են՝ հայաստանյան Ռեմբո, կամ Հուլիվերներ գործուղված լիլիպուտների աշխարհ, որ վնասել են 46 ոստիկան: Ոստիկանություն և դատական համակարգ՝ ինքներդ ձեզ մի ծաղրեք:
2. կապիտան սքօթ11:37 - 4 հոկտեմբերի, 2016
հիվանդ են ոնց գան?
3. Արջուկ11:38 - 4 հոկտեմբերի, 2016
շուտով կերևան
4. Ա12:29 - 6 հոկտեմբերի, 2016
Գան ինչ անեն?
Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ
Ամենա

Մեկնաբանված

Կարդացված