Չորեքշաբթի, 13 նոյեմբերի

Քաղաքացին 12 ժամ ոստիկանության բաժանմունքում է. փաստաբանին թույլ չեն տալիս տեսակցել նրան



Փաստաբանների պալատի անդամ Հայարփի Սարգսյանը «Հետքին» տեղեկացրեց, որ քաղաքացի Միքայել Նազարյանն արդեն 12 ժամ է՝ գտնվում է ոստիկանության Աշտարակի բաժանմունքում՝ առանց կարգավիճակի:

Փաստաբանի խոսքերով, Միքայել Նազարյանին առավոտյան հոր և եղբոր հետ բերման են ենթարկել: Փաստաբանն այս պահին գտնվում է բաժանմունքի շենքի դիմաց, սակայն ժամը 13:00-ից նրան թույլ չեն տալիս մտնել և տեսակցել քաղաքացուն: Փաստաբանը դիմել է Մարդու իրավունքների պաշտպանի գրասենյակ, սակայն պատասխանել են, որ բաժանմունքի պետը կտրականապես արգելել է փաստաբանին ներս թողնել: Պատճառաբանությունը՝ «ինչ-ինչ միջոցառումներն են»: Պաշտպանի գրասենյակից քիչ անց ասել են, որ շուտով ներս կթողնեն, սակայն մինչ այժմ այդպես էլ ներս չեն թողել:

Փաստաբանը հաղորդեց, որ սկզբում պետը դուրս է եկել շենքից, ներկայացել է որպես բաժանմունքի պետ, սակայն չի ասել անուն-ազգանունը, հրավիրել է զրույցի:

Քիչ հետո բաժանմունքից փաստաբանին հայտնել են, որ շուտով Միքայել Նազարյանը դուրս կգա, մի քանի հարց են ճշտում, սակայն Միքայելն այդպես էլ դուրս չի եկել: Նույն պահին Նազարյանը փաստաբանին տեղեկացրել է, որ իրենց բռնի ուժով թույլ չեն տալիս դուրս գալ բաժանմունքից:  

Հայարփի Սարգսյանն ասաց, որ դա բացառապես անօրինական և քրեորեն պատժելի արարք է ՝ քաղաքացու հրավերով ժամանած փաստաբանին ներս չթողնել:

Եթե Հայարփի Սարգսյանին թույլ չտան ներս մտել բաժանմունք, նա վաղը դատախազությանը հանցագործության մասին հաղորդում է ուղարկելու՝ նշելով, որ ոստիկանության Աշտարակի պետն անձամբ խոչընդոտել է իր հանդիպմանը քաղաքացի Միքայել Նազարյանի հետ: 

Լուսանկարում՝ փաստաբան Հայարփի Սարգսյանը


Գլխավոր էջ



Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ
Ամենա

Մեկնաբանված

Կարդացված