ՈՒրբաթ, 15 նոյեմբերի

ՊՆ պաշտոնյա. «Այդ բեռը չենք թողնելու զինվորի ընտանիքի վրա»



Հայկական բանակում ընդամենը 45 օր ծառայած ու ծանր հիվանդության՝ սարկոմայի պատճառով զորացրված 21-ամյա Մայիս Գեղամյանը որոշ ժամանակ չի գնա Իրավաբանական քոլեջ ու աշխատանքի: Նա կրկին քիմիոթերապիայի կուրսեր է անցնում: Ծանր հիվանդությունը փորձում է գլուխ բարձրացնել: Բայց Մայիսն ու իր ընտանիքը պայքարում են:

«Հետքը» զրուցեց Մայիս Գեղամյանին բուժող օնկոլոգ Լևոն Բադալյանի հետ: Նրա խոսքով, նախկին զինվորի թոքի մեջ ուռուցքային կետերը վերացել էին թվով 7 քիմիոթերապիայի արդյունքում: Սակայն մեկ տարվա ախտադադարից հետո աճ է գրանցվել: «Առաջին անգամ հիվանդությունը շատ լավ ենթարկվեց բուժմանը, տեսնենք, թե երկրորդ անգամ ինչպես կհաջողվի գրոհել»,- ասաց բժիշկը՝նշելով, որ Մայիսն արդեն մեկ կուրս քիմիոթերապիա անցել է: Եվս մեկը նախատեսվում է:  

Ինչ վերաբերում է տվյալ հիվանդության համար արդյունավետ ու ժամանակակից դեղորայքի գներին, ապա օնկոլոգ Լևոն Բադալյանն ասաց, որ դրանք բավականին թանկ են: ««Նաիրի» կենտրոնը որոշ բարեգործական դեղորայքով կօգնի, կաջակցի նաև պաշտպանության նախարարությունը»,-ասաց բժիշկ Բադալյանը:

Գեղամյանները սոցիալապես անապահով պայմաններում են ապրում: Հայրը ոստիկանության մայոր է, թոշակառու, 2-րդ կարգի հաշմանդամ է, պարբերաբար մեկնում է արտագնա աշխատանքի, որ կարողանա հոգալ ընտանիքի կարիքները: Մայիսի քույրը` ուսանող է, եղբայրը զինվորական ծառայության մեջ է, տատիկը թոշակառու, մայրը չի աշխատում, խնամում է իրեն: Այս երկու տարվա ընթացքում ընտանիքում գոյացել են պարտքեր, վարկային պարտավորություններ:

Մայիս Գեղամյանի հայրը՝ Պետրոս Գեղամյանը

«Հետքը»  զրուցեց նաև  ՊՆ ռազմաբժշկական վարչության պետ Կամավոր Խաչատրյանի հետ: ՊՆ պաշտոնյան նշեց, որ Մայիս Գեղամյանը զինվորական հաշմանդամություն ունի, և բուժումները, հետազոտությունները կազմակերպել ու կազմակերպում են օրենքով նախատեսված կարգով Պաշտպանության նախարարի 410 հրամանի համաձայն:

«Մենք հույս ունենինք, որ այն քիմիոթերաիան, որ կատարվել էր, կկանխարգելի հիվանդության հետագա զարգացումները: Նորից KT հետազոտություն արեցինք: Թոքերում փոքրիկ օջախներ կային, որոշակի մեծացել են: Այս անգամ նույնպես միանշանակ աջակցությունը լինելու է, դրանում ոչ մի խոսք: Եվս մեկ կուրս պիտի արվի: Այդ բեռը չենք թողնելու զինվորի ընտանիքի վրա: Ընտանիքը այդ հնարավորությունը չունի»,- ասաց ՊՆ ռազմաբժշկական վարչության պետ Կամավոր Խաչատրյանը: Նա ընդգծեց, որ ուղեգրի մեջ չի ներառվում այդ հիվանդության համար նախատեսված ժամանակակից ու արդյունավետ դեղամիջոցի գումարը, սակայն իրենք այդ հարցը կհոգան այլ ծրագրով:

Մայիս Գեղամյանն անցած ամռանը պետք է զորացրվեր բանակից, սակայն ողբերգական դեպքի հետևանքով հասցրել էր ծառայել ընդամենը 45 օր: Ծառայության 4-րդ օրը ստացած ծնկի վնասվածքի տեղում առաջացել էր սարկոմա, ինչը դարձել էր ոտքի ամպուտացման պատճառ: «Հետքը» 2014 թ-ի հոկտեմբերին գրել էր ոտքը կորցրած զինվոր Մայիսի մասին` հանդիպելով նրան «Նաիրի» ԲԿ-ում, որտեղ նա անցնում էր քիմիաթերապիայի կուրս: Զինվորը մեր տեսախցիկի միջոցով դիմել էր մարդկանց: Մայիսի կանչին արձագանքել էին բազմաթիվ քաղաքացիներ, պետական պաշտոնյաներ, ՀՀ պաշտպանության նախարարը, ռազմաբժշկական վարչության պետը, որոնք եղել էր Գեղամյանների տանը: Ֆինանսական աջակցություն էր ցուցաբերվել թե պաշտոնյաների, թե քաղաքացիների կողմից:

Մայիս Գեղամյանը քոլեջ ընդունվելիս

Մայիսը սովորում է ԱՆ Իրավաբանական քոլեջում, դեկտեմբերին հանձնել է առաջին կուրսի ավարտական քննությունները: Արդարադատության նախկին նախարար Հովհաննես Մանուկյանն արձագանքել էր «Հետքի» «Հաշմանդամ դարձած զինվորն ուզում է սովորել բուհում ու աշխատանքի անցնել ԱԻՆ-ում» հոդվածին` զանգահարելով Գեղամյաններին ու առաջարկելով անվճար ուսումնառություն ԱՆ Իրավաբանական քոլեջում: Մայիսի երազանքն իրականություն էր դարձել: «Մայիսը Արուճից պարտաճանաչ գալիս էր դասի ու աշխատանքի մինչև հիվանդության նոր զարգացումը»,- պատմում էր Մայիսի հայրը ու նշում, որ քոլեջից տղային այցի են եկել քիմիոթերապիայի օրերին:

«Բուժումներս վերջացնեմ նորից դասի ու գործի եմ գնալու»,- ասում է Մայիս Գեղամյանը:  

Հ.Գ. Մայիս Գեղամյանի հոր` Պետրոս Գեղամյանի անունով դեռևս երկու տարի առաջ «ՎՏԲ-Հայաստան» բանկում բացվել է հաշվեհամար

AMD-16004103765804
USD- 16004103765805
EUR- 16004103765806
RUR- 16004103765807 

Մայիս Գեղամյանի մոր՝ Գայանեի համարն է՝ 093 81 88 04, հոր՝ Պետրոսի համարն է՝ 098 65 01 10


Գլխավոր էջ



Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ
Ամենա

Մեկնաբանված

Կարդացված