Երկուշաբթի, 21 հոկտեմբերի

«Վիտա ֆարմն» ընդդեմ Առողջապահության նախարարության



Այսօր Վարչական դատարանում կայացավ «Վիտա ֆարմ»-ն ընդդեմ Առողջապահության նախարարության հերթական դատական նիստը:
Ինչպես արդեն նշել էինք, դատարան դիմելու պատճառն այն էր, որ Հովհաննես Մարտիրոսյանի՝ «Վիտա ֆարմ» ընկերության մոտ 10 դեղի ներկրում «Դեղերի փորձագիտական կենտրոն»-ը տարբեր հիմքերով մերժել էր:

«Վիտա ֆարմ»-ի պահանջն է՝ վերացնել ԱՆ 864- Ա հրամանը և «Օքսիտոցին ռիխտեր» (լուծույթ, ամպուլաներ), ինչպես նաև «Քվամատել 20մգ» դեղերի ներմուծման հավաստագիր ստանալ:


Դեղերի փորձագիտական կենտրոնի տնօրեն Հակոբ Թոփչյանը Հովհաննես Մարտիրոսյանի բողոքն անհիմն է համարում:
«Մենք մինչև հիմք չենք ունենում, չենք մերժում: Հովհաննես Մարտրիրոսյանը միայն չի ներկրում, բերող շատ մարդիկ կան, շատ, բայց 100-ից մեկը որոշել է, որ ինքը շատ մեծ մասնագետ է, մնացածն անգրագետ էին»,- վերջերս մեզ հետ զրույցում ասել էր Հ. Թոփչյանը:

                                                                         Հովհաննես Մարտիրոսյան

Դատական նիստը նախագահում էր դատավոր Հրաչ Այվազյանը:

Նիստին երկու կողմերն էլ ներկա էին. հայցվոր՝ Հովհաննես Մարտիրոսյան, պատասխանող՝ Նելլի Թովմասյան և դեղգործակալության գնումների բաժնի փորձագետ Լուսինե Գասպարյան:
Պատասխանող կողմի ներկայացուցիչ Նելլի Թովմասյանը նիստի սկզբում, վկայակոչելով Վարչական դատավարության օրենսգրքի 66-րդ հոդվածի 2 մասը (այն է՝ «Եթե մինչև վարչական հայց ներկայացնելը միջամտող վարչական ակտը բողոքարկվել է վարչական կարգով, ապա հայցը ներառում է նաև վարչական բողոքի վերաբերյալ կայացված միջամտող վարչական ակտի վիճարկման պահանջ» ), պնդեց կարճել գործը, ինչը, սակայն, դատավորը մերժեց:

 «Օքսիտոցին ռիխտեր»

Այս դեղի ներմուծումը Առողջապահության նախարարությունը մերժել էր՝ հիմք ընդունելով «Դեղերի փորձագիտական կենտրոնի» եզրակացությունը, որում նշվել էր, որ դեղն ունի բաղադրության անհամապատասխանություն. ներմուծված դեղի մեջ սառցային քացախաթթու օժանդակ նյութի քանակությունը 0.5 mol /ml ծավալով ավելի էր, քան Հայաստանում գրանցվածը:

«Հայաստանում դեղերի պետական ռեեստրում օժանդակ նյութերի քանակի, որակի և այլ նրբությունների մասին տեղեկություններ չեն նշվում»,-նշեց Հ. Մարտիրոսյանը:
Նա նաև հավելեց, որ աշխարհի ոչ մի երկրում լաբորատոր փորձաքննության ժամանակ չի ուսումնասիրվում և չի որոշվում օժանդակ նյութի քանակությունը, որի հիման վրա ԱՆ-ն մերժման որոշում է կայացրել:
 

«Օժանդակ նյութը դեղի որակի վրա չի անդրադառնում,-պարզաբանեց Հ. Մարտիրոսյանը:- Նրա ֆունկցիան այն է, որ նա ապահովում է դեղի ձևը, քաշը, ph-ը, այսինքն՝ պայմանները, որոնք հնարավորություն են տալիս ազդող նյութը հեշտ օգտագործել»,- եզրափակեց նա:

Հովհաննես Մարտիրոսյանը պատմեց, որ «Գեդեոն Ռիխտեր»-ը Հայաստանի համար ստանում է բոլորովին նոր դեղ, որտեղ ph-ն արդեն բարձր է, և այդ միջավայրը կարգավորելու համար օգտագործել է ավելի փոքր քանակությամբ քացախաթթու, ինչը հանգեցրել է դեղի կազմում հայտարարագրված քացախաթթվի քանակի նվազեցմանը:

 «Պրեպարատը, որը մենք ներմուծել ենք, համապատասխանում է  Հայաստանի դեղերի պետական ռեեստրի 11 վավերապայմաններին,-ասաց Հ. Մարտիրոսյանը:- Ելնելով այդ վավերապայմաններից և ստուգելով, որ դրանք համապատասխանում են, այն ներմուծվել է»:

Պատասխանող կողմի ներկայացուցիչ Նելլի Թովմասյանը կարծիք հայտնեց, որ  դեղի ներկրման  11 վավերապայմանները նվազագույնն են և դեռևս բավարար հիմք չեն դրանք չմերժելու համար:

Դեղգործակալության ներկայացուցիչ Լ. Գասպարյանը հայտնեց, որ «Օքսիտոցինն» ունի պահման և տեղափոխման հատուկ պայմաններ (սառնարանային ), որոնք «Վիտա ֆարմ»-ը խախտել է:
«Նրա պահման պայմանը 2-15 աստիճան է: Դեղի տուփի մեջ դրվում են հատուկ ձայնագրող սարքեր,  որոնք ձայնագրում են դեղի պահման ջերմաստիճանի պահպանումը, սակայն նշված պարագայում ոչ մի փաստաթուղթ չի եղել, ջերմաչափ չի եղել, ինչը հիմք է տալիս այդ կետով ևս դեղի որակը չերաշխավորելու»,- մեկնաբանեց փորձագետը:

                                                                 Լուսինե Գասպարյան

Հովհաննես Մարտիրոսյանը պնդեց, որ պայմանները ոչ միայն պահպանվել և մինչև այժմ էլ այդ պայմաններում պահվում են, այլև հենց դեղգործակալության աշխատակիցն է կատարել դեղի նմուշառումը. «Եթե նա գիտի սառցային շղթայի մասին, եկել տեսել է, որ ես այն բերել եմ առանց այդ շղթան պահպանելու,  նմուշառման ակտում պարտավոր էր նշել, սակայն այդպիսի նշում չկա»,- ասաց Հ. Մարտիրոսյանը:

Ավելին, նա նշեց, որ մերժման փորձագիտական եզրակացության մեջ սառցային շղթայի վերաբերյալ որևէ նշում չի եղել:

Փորձագետ Լուսինե Գասպարյանը խոստացավ հաջորդ նիստին հայտնել, թե տեղափոխելիս պահպանման պայմանը որևէ իրավական ակտով ամրագրված է, թե ոչ:

 «ՀՀ առողջապահության նախարարությունը պետք է ավելի շատ մտահոգված լինի ազգաբնակչության մասով,-նշեց դատավորը,- այդ պահանջները ոչ թե  դատարաններում պետք է ներկայացնել՝ ասել՝ դուք ջերմաչափ չունեք և այլն, այլ ընդամենը պետք է համապատասխան կարգեր սահմանվեն»:

 «Իրենք նայում են՝ տուփը բռնում է՝ թույլ են տալիս: Եթե ուզում են թույլ չտալ, անցնում են բաղադրությանը»,- ժպիտով նշեց  Հ. Մարտիրոսյանը:

«Քվամատել 20 մգ»

Լուսինե Գասպարյանը, ինչպես «Հետք»-ի հետ զրույցում, դատարանում էլ վկայակոչեց  2010թ. «Գեդեոն Ռիխտեր» ընկերության դիմումը, որով վերջինս հայտնել էր, որ կատարել է դեղի կայունության շարունակական հետազոտություն և որոշել է նվազեցնել պահպանման ժամկետները 5-ից 4 տարի:

Եվ քանի որ ԱՆ-ն մինչ այժմ ժամկետի փոփոխման վերաբերյալ այլ դիմում չի ստացել, պահպանման ժամկետը մնացել է 4 տարի:

Հայաստանում գրանցված և ներկրված «Քվամատել 20մգ» ունի պահպանման նույն  պայմանները (15-30 աստիճան): 

««Գեդեոն Ռիխտերի»՝ ձեր ստացած դիմումի մեջ իրենք նշել են, որ 4 տարի կլինի ժամկետը, եթե դրանք պահպանեք 40 աստիճանի պայմաններում»,- դիմելով պատասխանող կողմին՝ ասաց Հ. Մարտիրոսյանը:

Վերջում նա գոհունակություն հայտնեց, որ նախորդ տարվա համեմատ «ԳՌ» ընկերության դեղերի գինը 80%-ով նվազել է և հավասարվել մեկ տարի առաջ իրենց առաջարկած գնին:

Հաջորդ դատական նիստը նշանակվեց մարտի 3-ին՝ ժամը 11:00-ին:

Հ.Գ. Նախքան նիստը սկսվելը, Հովհաննես Մարտիրոսյանը «Հետքի» հետ զրույցում նշեց, որ հավատում է իր հաղթանակին, ավելին՝ մերժված 5 անվանում դեղի համար նոր հայցադիմում է պատրաստում, որ բողոքարկի ԱՆ որոշումը:


Գլխավոր էջ


Տես նաև՝

ավելին



Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ
Ամենա

Մեկնաբանված

Կարդացված