Չորեքշաբթի, 23 հոկտեմբերի

Հակոբ Թոփչյան. «Շատ մարդիկ կան ներկրող, բայց 100-ից մեկը որոշել է, որ ինքը շատ մեծ մասնագետ է»



Հովհաննես Մարտիրոսյանի՝ «Վիտաֆարմ» ընկերության մոտ 10 դեղի ներկրում «Դեղերի փորձագիտական կենտրոն»-ի կողմից տարբեր հիմքերով մերժվել էր, և նա դիմել է դատարան:

Այսօր  Վարչական դատարանը հետաձգեց հերթական նիստը մինչև փետրվարի 1-ը:
«Հետք»-ը նյութ էր  հրապարակել այն մասին, որ «Դեղերի փորձագիտական կենտրոնը» , պաշտպանելով այս կամ այն արտադրողի շահերը, նպաստում է դաշտում արհեստական մենաշնորհի ստեղծմանը: Դա դժվարացնում է նոր դեղ ներկրողների մուտքը հայաստանյան շուկա , ինչը նպաստում է դեղերի գնի կամայականությանն ու աճին:

Փորձագիտական կենտրոնի տնօրեն Հակոբ Թոփչյանը համաձայն չէր նրա բողոքների հետ և պարզաբանումներ տալու ցանկություն հայտնեց, ինչը սպասված հարցազրույցից վերածվեց  քննարկման  և  դեղագիտական ոլորտում լրագրողի  գիտելիքների ստուգման, որի նպատակն էր ՝ ապացուցել, որ լրագրողը «բժիշկ և դեղագետ չէ», որպեսզի «քննադատի»  տվյալ  ոլորտը:

             Ապացուցել, որ լրագրողը «բժիշկ չէ և դեղագետ չէ»

Նախքան հարցազրույց-քննարկմանն անցնելը, գրանցվող դեղերի բաժնի ավագ փորձագետ Լուսինե Գասպարյանը, խնդրեց  պարզաբանել  հոդվածում գրված հետևյալ նախադասությունը «« «Դեղերի փորձագիտականկենտրոնը» այս կամ այն պատճառով (հիմնականում՝մարքեթինգային նկատառումներով) մերժում է դեղերի ներկրումը»:

Այնուհետեև հղում կատարեց կառավարության այն որոշմանը, որտեղ սահմանված է դեղերի ներկրման կարգը՝ ասելով, որ մարքեթինգային նկատառում նշված չէ:

Պարզաբանեցինք, որ այդ ձևակերպումը հեղինակային չէ, այլ վերցված է առողջապահության նախարարության պաշտոնական հաղորդագրություններից:

                                                                                                        Լուսինե Գասպարյան

«Չկա որևէ օրենք կամ ենթաօրենսդրական ակտ, որը հիմնավորի դեղի մերժումը մարքեթինագային նպատակով, դա բացառվում է»,-ասաց Լ. Գասպարյանը:

Ստիպված կրկնեցի այն միտքը, որ դա ԱՆ ձևակերպումն է. «Իրենք էլ չեն կարող նման բան ասել»,- դարձյալ շարունակեց դեղգործակալության աշխատակիցը:

Այնինչ օրերս Առողջապահության նախարարությունը մեր ուղարկված հարցմանը պատասխանել էր, թե ինչ ասել է «մարքեթինգային նկատառում», որի պատճառով մի քանի դեղի գրանցումն անվավեր է ճանաչվել:

Այնուհետև աշխատակիցն ասաց, որ գրանցումը կարող է  մերժվել մարքեթինգային նկատառումներով, բայց  ոչ ներկրումը:

Սակայն՝ ո՞րն է տարբերությունը, եթե ներկրման հիմնական և կարևորագույն պայմաններից է դեղի գրանցված լինելը:

«Ներկրումը ԱՆ մերժում է միայն, եթե դեղը գրանցված չէ, կամ կա մի ցուցանիշ, որ ազդում է դեղի որակի, անվտանգության և արդյունավետության վրա, մնացած բոլոր դեպքերում  ԱՆ թույլ է տալիս»,-ասաց  Լ. Գասպարյանը:

«Եթե մենք ապացուցենք, որ դեղի արդյունավետությունը ցածր է, անվտանգությունը չի ապահովում, վտանգավոր դեղ է, այդ ժամանակ նախարարությունը, մեր եզրակացության վրա ի վիճակի է դեղի շրջանառությունը կանգնեցնելու մարքեթինգային նկատառումներով,-լրացրեց Հակոբ Թոփչյանը,-Մնացած բոլոր դեպքերում դեղի շրջանառության կանգնեցման իրավատեր հանդիսանում է արտադրողը կամ իրավատերը»:

                                                                   Հակոբ Թոփչյան

 Հաջորդ թիրախը «արհեստական մոնոպոլիա» ստեղծելու բառակապակցությունն էր:

«Ինչի՞ հիման վրա եք դա գրել,- հետաքրքրվեց պարոն Թոփչյանը:-Մենք մոնոպոլիստ չենք ստեղծում շուկայում»:

 Քվամատել 20 մգ 

Այս դեղը ՀՀ-ում գրանցվել է դեռևս 1995թ.ին: Պիտանելիության ժամկետը ի սկզբանե  եղել է 5 տարի: 2010թ. դեղի իրավատեր « Գեդեոն Ռիխտեր» ընկերությունը դիմել է Առողջապահության նախարարություն՝ասելով, որ կատարել է դեղի կայունության  հետազոտության, որի հիման վրա որոշել է պիտանելիության ժամկետը 5 տարուց  դարձնել 4:

Այն հարցին, թե այդ դեպքում ինչպես է «Գեդեոն Ռիխտեր» ընկերությունն իր երկրի համար արտադրում 5 տարի պահպանման ժամկետով, Լուսինե Գասպարյանը չկարողացավ պատասխանել՝ նշելով, որ իրենք միայն պատասխանատու են Հայաստանի համար:

«Մենք նայում ենք Ռուսաստանի գրանցամատյանները, տեսնում ենք՝ 5 տարի է,-ասում է է Հ.Թոփչյանը,- մենք իրավունք չունենք ուղղորդելու արտադրողին, թե ինչի 5 տարի չես տալիս, տալիս ես 4 տարի»:

Հակոբ Թոփչյանը հավելեց, որ զուգահեռ ներմուծման դեպքում պիտանելիության ժամկետը նույնիսկ չի ենթարկվում քննարկման:

-Ստացվում է Հովհաննես Մարիտիրոսյանի հնչեցրած բողոքները «Քվամատել»  դեղի վերաբերյալ անհի՞մն են։

Հակոբ Թոփչյան. -  Մենք մինչև հիմք չենք ունենում, չենք մերժում : Հովհաննես Մարտրիրոսյանը միայն չի ներկրում, բերող շատ մարդիկ կան, շատ, բայց 100-ից մեկը որոշել է, որ ինքը շատ մեծ մասնագետ է, մնացածն անգրագետ էին։

Նա նաև  խորհուրդ տվեց մի քիչ ինքնաքննադատ լինել և չասել, թե ինքն ամեն ինչ գիտի (խոսքը Հ.Մարտիրոսյնի մասին է, հեղ.), իսկ դեղն այնպիսի բան չէ, որ ամեն մարդ կարողանա բերել։

 

                                        Գալազոլին

-«Գալազոլին»  դեղի պարագայում  կար փաթեթավորման խնդիր (անվանումը, ազդող նյութը, դեղաչափը, դեղաձևը նույնն են): Բայց չէ՞ որ կառավարության N 581 որոշման 18-րդ կետով, չի արգելվում այնպիսի դեղերի ներկրում, որոնց փաթեթավորման փոփոխությունները չեն ազդում դեղի որակի վրա:

ՀԹ-  Հարյուր անգամ այս հարցին պատասխանել եմ այդ  «խոշոր գիտնականին»: Դեղի փաթեթի վրա գրվող ամեն մի տող ունի հատուկ կարգավիճակ: Տվյալ դեպքում, փաթեթի վրա մի դեպքում գրված է միայն «Գալազոլին» և «Գալազոլին 0,1», դրանք տարբեր բաներ են, թեկուզ կոնցետրացիաները նույնն են :

-Այսինքն՝ դրանք տարբե՞ր դեղեր են։

Հ.Թ.- Դրանք կարող են նույն դեղը լինել , բայց մենք չենք կարող սա սրանով փոխարինել։

-Տարբերությունը կասե՞ք։

Հ.Թ.- Տարբերությունը գրանցամատյանում  դեղերի գրանցման անվան անհամապատասխանությունն է։ Արտադրողը որոշել է, որ սա է շուկան, վերջացավ, ես չեմ կարող միջամտել։ Թեկուզ ազդող նյութը և բոլոր մնացած ցուցանիշները նույնը լինեն։

-Դուք, որպես մասնագետ, ի՞նչ կարծիք ունեն այս դեղերի մասին։

Լ.Գ․-Ես համարում եմ, որ այս  2 դեղերը ունեն տարբեր անվանումներ:

-Կարելի ՞ էր  կատարել որակի փորձաքննություն, պարզելու համար՝ նույնն են, թե ոչ։

ՀԹ․- Ոչ՜, չի կարելի։

-Ստացվում է՝ պաշտպանվում են  միայն արտադրողի շահերը, ինչը կարող է հանգեցնել գների կամայականությանը։

ՀԹ․- Մենք պարտավոր ենք պաշտպանել հեղինակային իրավունքները։ Որպես մասնագետ՝ նայում եմ՝ 0,1 %  /  0,1% , ասում եմ՝  խմիր, նույնն է, բայց, որպես պետական կառույց, ես պարտավոր եմ պաշտպանել հեղինակային իրավունքը։

-Այդ դեպքում ՝ի՞նչ է նշանակում  581 որոշման 18-րդ կետը։

Հ.Թ -Այդ որոշումն ունի թերություններ։ Սա նույն դեղանյութ է՝ նույն դեղաչափով, նույն կաթիլներով, բայց  տարբեր անուններով։

ԼԳ- Կան փաթեթավորման շատ փոփոխություններ, ենթադրենք, կարող է լինել գրառումների  տեղակայման փոփոխություն, գրառումների շարադաության փոփոխություն, դրանք որակի վրա չեն ազդում։

Վերջինս  նաև հավելեց, որ դեղի մերժման պատճառներից մեկն այն էր, որ կար կիրառման անհամապատասխանություն. Հայաստանում այն թույլատրելի է 12 տարեկանից, իսկ ՌԴ-ում՝ 6։

«Եվ մի՛ ասեք,  դուք լաբորատորիա ունեք,  որոշեք՝ դեղը նույնն է, թե նույնը չի․ ոչ,  մենք չենք որոշում, մենք փաստում ենք գրանցված դեղի իսկությունը, որակը և անվտանգությունը»,-եզրափակեց Հ. Թոփչյանը:

Ցեռուկալ

Փորձագիտական եզարակացության մեջ այս դեղը մերժվել է չգրանցված լինելու պատճառով․չի համապատասխանել գրանցման հավաստագրի իրավատիրոջ անունը։ 

ԼԳ- Գրանցման հավաստագրի իրավատերն է  AWD-ն, իսկ ներկրվող դեղի գրանցման հավաստագրի իրավատերն էր TEVA  կազմակերպությունը։

-Բայց հետագայում փոփոխություն է եղել, և իրավատերը փոխվել է։

ԼԳՀայաստանի հանրապետության Առողջապահության նախարարությունը նման փոփոխության մասին մեզ չի հայտնել։

 -Այդ դեպքում, ստացվում է՝ պետական ռեեստրում  գրանցված է դեղ մի ընկերության անունով, որն այլևս արտադրանքի իրավատերը չէ։

ՀԹ․-Շատ բան կարող են փոխանցել, մենք այդ փոխանցումը պետք է ունենանք իրավական հիմքերով։ Մենք չենք ստացել թուղթ՝ իրավական հիմքերով, որտեղ նշված լինի՝ խնդրում եմ այս դեղը ևս ճանաչեք։

Մետրոգիլ

Այս դեղի պարագայում տարբերությունը եղել է այն, որ Հայաստանում գրանցված դեղի տուփի վրա նշված է եղել արտադրողի արտադրատարածքը (կոնկրետ որտեղ է արտադրվել), և Հովհաննես Մարիտիրոսյանից պահանջել էին BATCH certificate (սերիայի հավաստագիր):

ԼԳ-Ներմուծվող փաթեթի վրա բացակայել է արտադրատարածքը, սակայն  ներդիր թերթիկում միաժամանակ նշված է եղել 2 արտադրատարածք։ Եվ որպեսզի մենք պարզաբանենք և հստակեցնենք, թե տվյալ դեղը կոնկրետ որտեղ է արտադրվել, խնդրել ենք հավելյալ փաստաթղթեր:

                                        Ֆինլեպսին

   Այս դեղը նախորդի պես ուներ նույն խնդիրը։ Ըստ Լուսինե Գասպարյանի՝ փաթեթի վրա արտադրատարածքը բացակայել է, սակայն ներդիրում միաժամանակ նշված են եղել մի քանի արտադրողներ։ 
 Այն ևս  սպասում է BATCH certificate-ի։

 

Լ․Գասպարյանը նշեց, որ  նույն «Վիտաֆարմ»-ը ներկրում էր այնպիսի դեղեր, ինչպես օրինակ՝ «Օքսիտոցինը», որի պահման համար  հատուկ պայմաններ չուներ։

«Դրա մասին չի՞ ասել այդ գիտնականը,- հետաքրքրվեց Հ․ Թոփչյանը։- 72 դեղ է բերել ինքը (նկատի ունի ՀՄարտիրոսյանին, հեղ.), 18 կանգնել են, 18-ից  9 ցմահ  են կանգնել, իսկ 9 մեջ էլ կան դեղեր, որոնք աստիճանաբար բաց են թողնվում»։

Իսկ ինչ վերաբերում էր «Գեդեոն Ռիխտեր»-ի բաժնետերերը պատվավոր հյուպատոսներ են, Հակոբ Թոփչյանն ասաց, որ դա իրենց չի վերաբերում։

ՀԹ․- Նրանք ձեզ պարզաբանում կարծեմ տվել են, այդ հյուպատոսները, չէ՞։

-Ո՛չ, իսկ դուք ինչի՞ց ենթադրեցիք։

Հ.Թ. –Դե, նրանց չի արգելվում նման բիզնեսով զբաղվել։ Հիմա հյուպատոս է, թե ինչ է, ի՞նչ նշանակություն ունի։

 

Շարունակելի


Գլխավոր էջ


Տես նաև՝

ավելին



Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ
Ամենա

Մեկնաբանված

Կարդացված