ՈՒրբաթ, 22 նոյեմբերի

Տուժող. «Եթե ունենայի գումար, պաշտոնական դիրք, ամեն ինչ ուրիշ ձևով կլիներ»



Մասիսի բնակչուհի Սաթենիկ Գևորգյանը, ով ութ տարի պայքարում է աղջկա` 19-ամյա Սուսաննա (Սյուզի) Գևորգյանի մահվան իրական հանգամանքները պարզելու համար, ևս մեկ դատական մերժում ստացավ:

Երեկ Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը (դատավոր Լևոն Ավետիսյան) մերժեց Սաթենիկ Գևորգյանի և նրա ներկայացուցիչ Գևորգ Գյոզալյանի բողոքն ընդդեմ ՀՔԾ-ի կարճման որոշման:

Սուսաննա Գևորգյանի մահվան փաստի առթիվ հարուցված քրեական գործի մասին «Հետքը» գրել է դեռ մեկ տարի առաջ` մեկ հատորանոց (107 թերթ) գործի նյութերն ուսումնասիրելով Արարատի ու Վայոց ձորի մարզերի ընդհանուր իրավասության դատարանի գրասենյակում (Արտաշատ քաղաքում), որտեղ տեղակայված է նաև դատական արխիվը:

Սուսաննա Գևորգյանը

Ըստ գործի նյութերի, 19-ամյա Սուսաննան մահացել էր 2007 թ-ի մարտի 9-ի երեկոյան 22:45-ին, երբ Նորամարգ-Մասիս ավտոճանապարհին Մասիսի բնակիչ Արարատ Կաֆյանի վարած «Օպել-Վեկտրա» մակնիշի ավտոմեքենան (որում գտնվել է Մասիսի բնակչուհի 19-ամյա Սուսաննա (Սյուզի) Գևորգյանը), բախվելով հողաթմբին, վթարի էր ենթարկվել: Արարատի ու Վայոց Ձորի ընդհանուր իրավասության դատարանը Արարատ Կաֆյանին մեղավոր էր ճանաչել ՔՕ 242-րդ հոդվածի 2-րդ կետով՝ դատապարտելով 2 տարվա պայմանական պատժի. նա մեկ օր անգամ չի ազատազրկվել: Տուժողի իրավահաջորդ Սաթենիկ Գևորգյանը մինչ օրս չի հավատում, որ աղջիկը զոհվել է վթարի հետևանքով: Փաստերն ու հանգամանքները վերլուծելով` նա եկել է այն եզրակացության, որ հնարավոր է աղջկա նկատմամբ բռնություն է եղել, իսկ վթարը «բեմադրվել» է, որպեսզի կոծկվի ծանր հանցագործությունը: Ամենամեծ կասկածը մոր մոտ հարուցել է այն, որ դեպքից հետո կորել են աղջկա ներքնաշորերը, որոնք կարող էին վկայել հնարավոր սեռական բռնության մասին:  Մահացած աղջկա մայրը՝ Սաթենիկը, մինչ օրս պնդում է, որ Կաֆյանին պատասխանատվությունից փրկել է նրա քննիչ աներձագը՝ Սամվել Անդրեասյանը, ով փեսայի զանգով դեպքից հետո առաջինն է եկել դեպքի վայր ու օգնել ազգականին` տեղափոխել դիակը: 

Քրեական գործի ողջ նյութերը կարդալով՝ հասկանալի դարձավ, որ «Օպել-Վեկտրայի» վարորդ, Մասիսի բնակիչ, ՌԴ քաղաքացի Արարատ Կաֆյանի նկատմամբ իրավապահները ցուցաբերել էին ծայրաստիճան բարեհաճ վերաբերմունք, ինչի մասին վկայում էին փաստերը

Մամուլի հրապարակումները հիմք դարձան, որպեսզի Սուսաննայի մոր` Սաթենիկ Գևորգյանի հաղորդման հիման վրա ՀՀ Հատուկ քննչական ծառայությունում դեպքից յոթ տարի անց` 2014-ի հունիսի 27-ին հարուցվի նոր քրեական գործ`ՔՕ 308 հոդվածի 2-րդ մասի հատկանիշներով (պաշտոնատար անձի կողմից իր պաշտոնեական դիրքը ծառայության շահերին հակառակ օգտագործելը կամ ծառայողական պարտականությունները չկատարելը, որն անզգուշությամբ առաջացրել է ծանր հետևանքներ): Սակայն ՀՔԾ ՀԿԳ ավագ քննիչ Գուրգեն Հակոբյանն իր գործընկեր՝ մեկ այլ քննիչ Կ. Թադևոսյանի արարքներում այդպես էլ հանցակազմ չի տեսել ու մեկ տարի անց կայացրել քրեական գործը կարճելու որոշում: Այդ որոշման մեջ նշված է, որ քննիչ Գ.Հակոբյանը որոշում է կայացվել դատաբժշկական, դատակենսաբանական, դատահետքաբանական և դատաավտոտեխնիկական համալիր փորձաքննություն նշանակելու մասին, հարցաքննել է հիմնական գործը քննած քննիչին, Կաֆյանի աներձագ-քննիչ Սամվել Անդրեասյանին, նրանց առերես հարցաքննություն անցկացրել Սաթենիկ Գևորգյանի հետ: Հենց կարճման որոշումն էլ բողոքարկում էին Սաթենիկ Գևորգյանն ու նրա ներկայացուցիչ, փաստաբան Գևորգ Գյոզալյանը: Մինչդեռ դատարանը մերժեց նրանց բողոքը` հրապարակելով միայն որոշման ներածական ու եզրափակիչ մասերը:

Մինչ դատավոր Լևոն Ավետիսյանի խորհրդակցական սենյակ անցնելը, Սաթենիկ Գևորգյանը պնդեց բողոքը.

-Պարոն Ավետիսյան, Դուք տեղյակ եք, ես 8 տարի պայքարում եմ իմ իրավունքների համար` որպես տուժողի իրավահաջորդ: Օրենքն ասում է, որ որպես տուժող ես կարող եմ ստանալ իմ հարցերի պատասխանները, բայց 8 տարի է` չեմ ստանում դրանք: Եթե ունենայի պաշտոնական դիրք, ժամանակի ընթացքում կստանայի իմ հարցերի պատասխանները:

Սաթենիկ Գևորգյանը դատարանից պահանջեց նաև գրավոր պատասխանել, թե ինչու է նույն դատարանում իր գործով երկու բողոք ընդունվել` մեկը ստորագրված, մյուսն` անստորագիր:

- Հուլիսի 22-ին է ստացվել բողոքն ու մակագրվել է ինձ, հետագայում ուղարկվել է նաև բողոքի պատճենը և այս անգամ մակագրվել է դատավոր Արմեն Խաչատրյանին: Սա ձևական, ոչ էական խախտում է իմ կարծիքով, խախտում էլ չէ,- պատասխանեց դատավոր Լևոն Ավետիսյանը:

Դատարանի մերժումից հետո Սաթենիկ Գևորգյանն ասաց, որ դիմելու են վերաքննիչ դատարան. «չնայած ոչ մի վստահություն չունեմ դատարանի նկատմամբ: Ուղղակի ուրիշ ճանապարհ չկա: Եթե ունենայի գումար, պաշտոնական դիրք, ամեն ինչ ուրիշ ձևով կլիներ»,- ասաց 19-ամյա աղջկան կորցրած կինը:

Ինչպե՞ս է անստորագիր բողոքը մուտք արվել դատարան

«Հետքը» զրուցեց նաև Սաթենիկ Գևորգյանի ներկայացուցիչ Գևորգ Գյոզալյանի հետ, ով մեր լուսաբանումներին ու Սաթենիկ Գևորգյանի կոչին արձագանքելով` դեռ 2014 թ-ից ստանձնել է նրա շահերի պաշտպանությունը:

Փաստաբան Գևորգ Գյոզալյանը

Փաստաբան Գյոզալյանը տեղեկացրեց, որ Արաբկիր և Քանաքեռ-Զեյթուն դատարանում  իրենց բողոքը ստացվել է հուլիսի 22-ին: «Հուլիսի 27-ին կայծակնային արագությամբ նիստ է նշանակել դատավոր Արմեն Խաչատրյանը: Ծանուցումը ստացել ենք նույն օրը, բնականաբար չենք մասնակցել: Օգոստոսի 12-ին էլ ենք ստացել ծանուցում, բայց արդեն Լևոն Ավետիսյանի օգնականից: Օգոստոսի 12-ին էր նիստը նշանակված, բնականաբար չենք հասցրել գնալ: Հետո նիստ է նշանակվել սեպտեմբերի 16-ին: Իսկ հոկտեմբերի 22-ին նորից ծանուցում եմ ստացել, բայց այստեղ արդեն գործի համար էր փոխված»,- պատմեց փաստաբանը:

Դատավոր Արմեն Խաչատրանը հոկտեմբերի 27-ին նիստ է նշանակել, բայց հոկտեմբերի 30-ին է որոշում կայացրել, որ բողոքը մնում է առանց քննության և վերադարձվում է, քանի որ ստորագրված չէ բողոքաբեր Սաթենիկ Գևորգյանի ու նրա ներկայացուցիչ Գևորգ Գյոզալյանի կողմից:

Փաստաբան Գյոզալյանը դիմել է ՀՀ դատական դեպարտամենտի ղեկավարին ու Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի նախագահին: Հարցերի հարցը մնում է այն, թե ինչպես է անստորագիր բողոքը մուտք արվել դատարան:

«Դատարանի գրասենյակի աշխատակիցները հրաժարվում են ընդունել այնպիսի բողոքներ, դիմումներ, երբ այնտեղ կան անճշտություններ, անստորագիր են: Ցանկացած գրասենյակ մտեք, փորձեք բողոք ներկայացնել, որտեղ շեշտված չէ «պատճենը» բառը, կասեն` գրեք, որ բողոքի պատճենն է ներկայացվում»,- ասում է Գևորգ Գյոզալանը` հիշելով, որ դատավորի օգնականը խնդրել է էլեկտրոնային փոստով ուղարկել իրենց բողոքի պատճենը: Երկու հասցե են իրեն տվել, երկուսով էլ ուղարկել է. «հնարավոր է` գրասենյակի աշխատակիցը տպել է այդ անստորագիր բողոքն ու տվել դատարանի նախագահին»,- պարզաբանում է փաստաբանը,- «Իրենց պատճառաբանությունը հետևյալն է` անփույթ աշխատանքի հետևանք է: Ես կարծում եմ`եթե դիտավորություն լիներ, մինչև վերջ կտանեին: Բայց քանի որ բացահայտ է փնթիությունը, հակված եմ հավատալ, որ միայն փնթիություն է: Սակայն սա որևէ կերպ չի արդարացնում նրանց, որովհետև այս գործով բոլորը այսպիսի փնթի աշխատանք են տարել, որի հետևանքով Սաթենիկ Գևորգյանը մինչ օրս բողոքում է»:

Առաջին լուսանկարում Սաթենիկ Գևորգյանն է


Գլխավոր էջ



Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ
Ամենա

Մեկնաբանված

Կարդացված