ՈՒրբաթ, 22 նոյեմբերի

Փայլակ Հայրապետյան. «Աշոտն ասեց` էս գործը 33 կողպեքի տակ ա, քեզ պես հարյուրը չի բացահայտի»



«Օֆշորի» գործով դատական նիստն այսօր հետաձգվեց դատախազի բացակայության պատճառով: Էրեբունի և Նուբարաշեն վարչական շրջանների ընդհանուր իրավասության դատարանի նախասրահում զրուցեցի տուժող, գործարար Փայլակ Հայրապետյանի հետ, ով պնդում է, որ իրեն կազմակերպված ձևով ունեզրկել են:

-Պարոն Հայրապետյան, գործից առանձնացրել է նախկին վարչապետ Տիգրան Սարգսյանի մասը, այն դեռ նախաքննության փուլում է: Որևէ քննչական գործողություն կատարվե՞լ է Ձեզ հետ:

-Արդեն 4-5 անգամ զանգել եմ քննիչին, հարցրել եմ` քննություն կատարվելու է, թե ոչ: Քննիչն էլ պատասխանել է` իհարկե կատարվելու է, ասել է, որ ինձ էլ կհրավիրեն անպայման: Բայց էսքան ժամանակ չեն կանչել ցուցմունք տալու:

- Ինչո՞ւ առանձնացվեց այդ մասը, Ձեր կարծիքով:

-Քննիչը պատճաբանել է, որ հիմնական գործի ժամկետի մեջ չէին տեղավորվում, դա էր պատճառը, որ այդ մասով գործն առանձնացվեց:

- Հնարավոր է այդպիսի լուծում գտան, որ գործի հանրային հնչեղությունը մեղմեն:

-Ճիշտ ասած, ես հավատացյալ մարդ եմ, ինչ պատճառաբանություն բերել են հավատացել եմ, բայց, թե իրականում ինչ մտադրություն են ունեցել գործն առանձնացնելով` չեմ կարող ասել:

- Ե±րբ իմացաք, որ օֆշորային գոտում` Կիպրոսում գրանցված ընկերություններից մեկի բաժնետերերն են Աշոտ Սուքիասյանը, նախկին վարչապետ Տիգրան Սարգսյանն ու Նավասարդ Արքեպիսկոպոս Կճոյանը: 

-2012, թե 2013 թվականն էր, երբ գնացի Աֆրիկա, հանդիպեցի Աշոտ Սուքիասյանի հետ: Աշոտն ասեց` գնա, քեզ ոչ մի բան չեմ տալու: Ասեց` էս գործը 33 կողպեքի տակ ա, քեզ պես հարյուրը չի կարող բացահայտել: Դատի տվեցի Աշոտին ու մեծ սկանդալով թողեցի, եկա Հայաստան: Շշմած նստել էի գրասենյակում: Ընկերս ասեց, որ դիմեմ «Հետքին»: Երբ հրապարակվեց «Հետքի» հետաքննությունը, արդեն բոլորը իմացան էն, ինչ ես էլ չգիտեի:

- Դատավարության սկզբում նշեցիք, որ ամբաստանյալ Աշոտ Սուքիասյանի կողքին ևս 8 անձ պետք է նստած լիներ: Ձեր կարծիքով ինչո՞ւ այդպես չէ:

- Կամք պիտի լինի, ուրիշ ոչինչ:

- Հենց դատավարության սկզբում դիմեցիք միջնորդությամբ, որ դատարան հրավիրվեն նախկին ու ներկա բարձրաստիճան պաշտոնյաներ, այդ թվում Տիգրան Սարգսյանն ու Սամվել Կճոյանը: Դատավորը հետաձգեցայդ միջնորդության քննությունը: Ի՞նչ եք կարծում, դատարանը կկարողանա բավարարել այդ միջնորդությունը: 

-Ինձ համար բարեբախտաբար, իրենց համար դժբախտաբար կծիկը քանդվեց: Էս ոսկորը կուլ չի գնա: Ինձ թվում է, արդարություն գոյություն ունի, հույս ունեմ, որ գումարները հետ եմ բերելու, մեղավորներն էլ պատասխանատվություն են կրելու: Ես էսօր արդեն հաղթած եմ, բարոյական հաղթանակն արդեն ունեմ:

Վերջին դատական նիստին մեղադրող դատախազ Դավիթ Վեքիլյանը, հրապարակելով Կիպրոսից ստացված ապացույցները, նշեց, որ Տիգրան Սարգսյանի` Կիպրոսում գրանցված «WLISPERA HOLDINGS LIMITED» ՍՊԸ-ում ունեցած բաժնեմասերը փոխանցվել են Էդգար Սուքիասյանին ու Շուշանիկ Դավթյանին:  

Հիշեցնենք, որ ադամանդագործ Աշոտ Սուքիասյանը 2010թ. հունիսի 25-ից մինչև 2011թ. հունիսի 15-ն ընկած ժամանակահատվածում «Ամերիաբանկ» -ից մաս-մաս ստացել է 10 միլիոն 700 հազար ԱՄՆ դոլար վարկ` տուժող ճանաչված Փայլակ Հայարպետյանից ստացած լիազորագրերի հիման վրա ու Փայլակ Հայրապետյանին ու իր ընտանիքի անդամներին սեփականության իրավունքով պատկանող անշարժ գույքը գրավադրելով: Ըստ տուժողի ցուցմունքի և ըստ այլ ապացույցների, կազմվել էր բիզնես պլան, որի շրջանակներում պետք է գնվեին մեքենա-սարքավորումներ, սակայն դրանք վերը նշված վարկով ձեռք չեն բերվել, այլ փոխանցվել են օֆշորում գրանցված ընկերություններ: Այդպիսով` բիզնես ծրագիրը չի գործել: Հետևանքը եղել է այն, որ «Ամերիաբանկը» չվճարած տոկոսների ու գումարների դիմաց վաճառել է Փայլակ Հայրապետյանին պատկանող գրավադրված անշարժ գույքը: Ու թեպետ տուժող Փայլակ Հայրապետյանը բազմիցս նշել է իր ունեզրկման մեղավորների անունները, այդուհանդերձ գործով միակ մեղադրյալը Աշոտ Սուքիասյանն է։  


Գլխավոր էջ



Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ
Ամենա

Մեկնաբանված

Կարդացված