Հինգշաբթի, 14 նոյեմբերի

«Վարդաշեն» ՔԿՀ-ում շարունակվում է հացադուլը



«Վարդաշեն» ՔԿՀ-ում այս պահին հացադուլի մեջ է ութ դատապարտյալ, որոնցից յոթի բողոքն ուղղված է պայմանական վաղաժամկետ ազատման անկախ հանձնաժողովի գործողությունների դեմ: Այս մասին «Հետքին» հայտնեց ՀՀ ԱՆ ՔԿՎ հանրային կապերի բաժնի պետ Գոռ Ղլեչյանը՝ տեղեկացնելով, որ հացադուլավոր 8 դատապարտյալների առողջական վիճակը այս պահին գնահատվում է բավարար:

Հացադուլավորներից երկուսը՝ պահեստազորի գնդապետ, անցյալ տարի 6 տարվա ազատազրկման դատապարտված Վոլոդյա Ավետիսյանը և ազատամարտիկ Հովսեփ Տերտերյանը հացադուլը սկսել են հոկտեմբերի 30-ից: Իսկ հաջորդ օրը նրանց են միացել Փայլակ Խանամիրյանը և սպա Ռաֆայել Մկրտչյանը: Այնուհետև հացադուլ են հայտարարել նաև ազատամարտիկ Գևորգ Հարությունյանը, Արմեն Վարդանյանը և պահեստազորի փոխգնդապետ Գեղամ Ասատրյանը:

Սպա Ռաֆայել Մկրտչյանի մայրը՝ Անահիտ Մկրտչյանը նամակով դիմել է ՀՀ նախագահ Սերժ Սարգսյանին:

Նամակում ասված է. «Մեկ ամսվա նորաթուխ սպա լինելով՝ որդիս՝ Ռաֆայել Մկրտչյանը, դատապարտվել է ազատազրկման  յոթ տարի ժամկետով, որից հետո Վճռաբեկ դատարանը մեղմել է պատիժը կրճատելով  վեց ամսով, նաև վեց ամսով կրճատվել  է համաներման արդյունքում: Մնացած վեց տարուց հինգ տարին արդեն կալանավայրում է: Ես՝ որպես մայր և որպես քաղաքացի, չեմ կարող  հասկանալ,  թե ինչու է ամեն անգամ մերժվում որդուս վաղաժամկետ ազատման դիմումը, այն դեպքում երբ այս հինգ  տարիների ընթացքում արդեն  յոթ անգամ կալանավայրի ղեկավարությունը որպես օրինակելի ու կարգապահ կալանավոր նրան ներկայացրել է վաղաժամկետ ազատման: Ուզում եմ նշել նաև, որ ունի խրախուսանք տրված  կալանավայրի ղեկավարության  կողմից, իսկ «անկախ» հանձնաժողովը ամեն անգամ մերժում է՝չտալով ոչ մի պատճառաբանություն»:

Իսկ պահեստազորի գնդապետ Վոլոդյա Ավետիսյանին անկախ հանձնաժողովն արդեն երկրորդ անգամ է մերժում պայմանական ազատել:

Բանտերից պայմանական ազատվողների թիվը գնալով նվազում է

Անկախ հանձնաժողովների ստեղծումից հետո՝ 2006 թ-ից սկսած հայաստանյան բանտերից պայմանական վաղաժամկետ ազատ արձակվողների թիվը սկսեց տարեցտարի նվազել: Ըստ վիճակագրության, եթե 2006 թ.-ին քրեակատարողական հիմնարկների վարչական հանձնաժողովները պայմանական ազատման համար անկախ հանձնաժողովներին են ներկայացրել այդ իրավունքը ունեցող դատապարտյալների 85 տոկոսին, ապա 2013 թ.-ին՝ միայն 18 տոկոսին: Այսօր պայմանական ազատության իրավունք ունեցողների միայն 5%-ն է պայմանական վերադառնում հասարակություն: Ըստ «Քաղաքացիական հասարակության ինստիտուտ» ՀԿ-ի ունեցած տվյալների, եթե 2013-ին պայմանական վաղաժամկետ ազատ արձակման անկախ հանձնաժողովի որոշմամբ ազատվել է 226 դատապարտյալ, ապա 2014-ին նրանց թիվը եղել է 184:

Քրեակատարողական հիմնարկներից պարբերական են դատապարտյալների բողոքները, որոնք պնդում են՝ պայմանական  վաղաժամկետ չեն կարողանում ազատվել: Իրավապաշտպաններն էլ ահազանգում են, որ ՀՀ նախագահի հրամանագրով գործող անկախ հանձնաժողովները չունեն մարդկանց պայմանականորեն ազատություն վերադարձնելու չափորոշիչներ:

Հիշեցում

ՀՀ նախագահի 2006 թ. հուլիսի 31-ի ՆՀ-163-Ն հրամանագրով սահմանվում են պայմանական վաղաժամկետ ազատման անկախ հանձնաժողովների կազմավորման և գործունեության կարգը, անկախ հանձնաժողովների կազմերը, գործունեության ֆինանսավորումը։ Անկախ հանձնաժողովների անհատական կազմերը, ըստ սպասարկվող քրեակատարողական հիմնարկների, հաստատում է ՀՀ նախագահը: Հանձնաժողովները բաղկացած են 8 անդամից, մեծամասնություն են կազմում տարբեր գերատեսչությունների ներկայացուցիչները՝ Ոստիկանություն, Առողջապահության նախարարություն, Կառավարությանն առընթեր ազգային անվտանգության ծառայություն, ՀՀ նախագահի աշխատակազմ, ԱՆ ՔԿՎ։ Ներառվում է նաև մեկական անդամ հանրային խորհրդից, ՄԻՊ գրասենյակից, ԵՊՀ հոգեբանության տեսության և պատմության ամբիոնից։


Գլխավոր էջ



Մեկնաբանություններ (5)
1. Հաբեթ20:11 - 4 նոյեմբերի, 2015
Շնորհակալություն նյութի համար
2. Անահիտ10:49 - 5 նոյեմբերի, 2015
ԳՈՆԵ ՄԵՑԱՐԳՈ ՀԱՆՁՆԱԺՈՂՈՎԻՆ ԼՍԵԼԻ ԼԻՆԵՐ ՁԵՐ ԱՐՁԱԳԱՆՔԸ... ԱՅՆ,ՈՐ ՆՐԱՆՑ ՆՇԱՆԱԿԵԼ ԵՆ ԺՈՂՈՎՐԴԻՆ ԾԱՌԱՅԵԼՈՒ ոչ թե ժողովրդին իրենց ծառայեցնելու
3. Էմիլյա10:52 - 5 նոյեմբերի, 2015
ՇԱՏ ՀԵՏԱՔՐՔԻՐ Է, ԹԵ «ԱՆԿԱԽ» ՀԱՆՁՆԱԺՈՂՈՎԸ, ԱՅԴ ԿԱՐՃ ՇՓՄԱՆ ԸՆԹԱՑՔՈՒՄ,ԻՆՉԻ՛Ց,ԵՎ ԻՆՉՊԵ՛Ս ՈՐՈՇԵՑ, ՈՐ ՆՐԱՆՔ ՉԵՆ ԿԱՐՈՂ ՎԱՂԱԺԱՄԿԵՏ ԱՐՁԱԿՎԵԼ, ԵԹԵ ԿԱԼԱՎԱՅՐԻ ՂԵԿԱՎԱՐՈՒԹՅՈՒՆԸ ,ՈՐ ԳՐԵԹԵ ԱՄԵՆ ՕՐ ՇՓՎՈՒՄ Է ՆՐԱՆՑ ՀԵՏ ԽՐԱԽՈՒՍՈՒՄ Է ՆՐԱՆՑ,ՈՐՊԵՍ ՕՐԻՆԱԿԵԼԻ ՈՒ ԿԱՐԳԱՊԱՀ ԿԱԼԱՆԱՎՈՐԻ:...
4. Nune11:10 - 5 նոյեմբերի, 2015
հարգելիներս ճիշտ եք անում,որ հրապարակում եք ախր նորմալ մարդն ել անտեսումից ու անարդարությունից հանցագործ կդառնա
5. Անահիտ13:23 - 5 նոյեմբերի, 2015
Այս արատավոր երևույթը կշարունակվի այնքան, քանի դեռ անկախ հանձնաժողովը կգործի միայն մեկ մարդու՝ հժ-ի նախագահի կամքով:Վերջինս արհամարհում է մնացած ութ անդամների կարծիքը: Դեռ դատապարտյալին չներկայացրած, դեռ չքննարկած, հանձնաժաղովի նախագահը հնչեցնում է իր կարծիքը, որին ընդդիմանում են 2-3-ը գուցե, իսկ մնացածը հլու-հնազանդ հետևում են իրենց ՝ չմտածելով, որ այդ բառի տակ քանի ճակատագրեր են կործանվում...քանի մայր է սպասում իր երեխայի վերադարձին, քանի երեխա է անհայր կամ անմայր մեծանում...քանի...Հարգելի անկախ հանձնաժողով ուշքի եկեք վերջապես, աշխատեք օրենքի տառին համահունչ, անկողմնակալ, արդար, որպեսզի գլուխներդ հանգիստ դնեք բարձին , որպեսզի այս կարճ կյանքում ձեզ չայցելեն մղձավանջները...
Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ
Ամենա

Մեկնաբանված

Կարդացված