ՈՒրբաթ, 22 նոյեմբերի

Յոթ ապագա զինվոր, յոթն էլ՝ նույն տնից


Երեխաներն ապրում են առանց սեփական տանիքի

Բակում չորացող լվացքի առատությունից պարզ է դառնում՝ այստեղ ապրում է բազմազավակ ընտանիք: Արմավիրի մարզի Լուկաշին գյուղում մեկ ընտանիքում մեծանում է յոթ ապագա զինվոր՝ Բորիսը, Վյաչեսլավը, Ալեքսանդրը, Իսահակը, Արամը, Արսենը, Արթուրը, որը լույս աշխարհ է եկել 1 ամիս առաջ:

Ամուսնուն՝ Բորիս Նազարյանին, յոթ արու զավակ պարգևած երիտասարդ՝ 32-ամյա կինը՝ Լուսինե Մկրտչյանը, ժպիտը երեսին դիմավորում է անծանոթ հյուրին, հրավիրում ներս: Մտնում ենք խոհանոց, գազօջախի վրա մեծ կաթսան է: 7 երեխա մայրը ճաշն արդեն պատրաստել է, երեք մեծ հացերը թխել ու երեխաներին է սպասում. «Հիմա իրար հետևից կգան դպրոցից»:  

Լուկաշինը 9 անդամ ունեցող Նազարյանների երրորդ բնակատեղին է Հայաստանում: Նազարյանների 4 զավակները ծնվել են Ռուսաստանում, որտեղ և աշխատել է 3-րդ կարգի հաշմանդանություն ունեցող ընտանիքի հայրը՝ Բորիսը (հիմա նա տարբեր աշխատանքներ է անում գյուղում): Սակայն հետո ամուսինները որոշել են տեղափոխվել Հայաստան. «Միշտ մտածել ենք, որ հայը պիտի իր հողում ապրի, տուն սարքի, էրեխեք մեծացնի, բազմանա, մի բուռ ենք դարձել»:

Նազարյանները վարձով ապրել են Սևանում, Արթիկում, Լուկաշինում, երեք տղաները երրորդ դպրոցն են փոխել: «Էլ չէինք կարողանում վարձ տալ: Այս տանը ուղղակի ժամանակավոր ապրում ենք, վարձ չեն վերցնում, բայց մերը չի, ուրիշի տուն է: Բայց գոնե մի օր արթնանանք ու իմանանք, որ մեր անկյունն ունենք,- ասում է Լուսինեն՝ պատմելով, որ ցանկացել է նույնիսկ հանրապետության նախագահին նամակ գրել տան խնդրի մասին: 

Պետությունը 7 երեխաներին միասին տալիս է 69.500 դրամ նպաստ, գումարած նրանց հոր հաշմանդամության թոշակը՝ 16.000 դրամ: «Ստացվում է՝ ամեն երեխայի համար ամսական պիտի ծախսենք 7.500 դրամ»,- ասում է Լուսինեն:

Անցյալ տարի փորձել են տունը գազով ջեռուցել, բայց երեխաների նպաստի չափ գազի գումար են վճարել: Ու այս տարի հրաժարվել են տունը գազով ջեռուցելու մտքից: Պարտք են վերցրել ու փայտ գնել:

Մեր զրույցի վերջում Լուսինեն պատմեց, որ իր հայրական տան միակ աղջիկն է եղել ու միշտ երազել ապրել մեծ ընտանիքում: «Անկախ ամեն դժվարությունից էրեխեքի մեջ հանգստություն ու ուրախություն եմ գտնում»:


Գլխավոր էջ

Մեկնաբանություններ (5)
1. Արմենակ Եղիայեան01:22 - 20 հոկտեմբերի, 2015
Ահաւասիկ ոսկի առիթ մը, որ Հայաստանի մեծահարուստները քիչ մը մարդկայնանան, հայանան՝ իրենզ ունեցածին մէկ ջնջին մասը, յետին փշրանքը նուիրաբերելով այս սքանչելի ընտանիքին՝ զայն ապահովելով տունով մը եւ կենցաղային տարրական պայմաններով: Կեանքի մէջ ինչ որ կու տանք՝ այն կը մնայ: Մնացեալը փրփուրի պէս կը ցնդի:
2. Գոհար Արշակյան18:17 - 20 հոկտեմբերի, 2015
Պետք է տեր կանգնել այս հրաշք ընտանիքին...
3. Anna13:17 - 21 հոկտեմբերի, 2015
Whatever the illness, poverty or misery, heartache or even dispair, you can pray to Saint Apostle Thaddeus and ask for his intercession. He is the patron saint of Armenia, lost causes and desperate situations. Lusine is a hero mother and she deserves all the love and appreciation.
4. Վաչե03:52 - 23 հոկտեմբերի, 2015
Այս հրաշք ընտանիքը առաջին հերթին պետք է գտնվի պետության լիակատար հոգածության ներքո, իսկ եթե նրանց սատարեն նաև բարերարները ապա դա կլինի կատարյալ հրաշք։
5. GB21:29 - 25 հոկտեմբերի, 2015
Low birth Armenia should look after these wonderful boys!
Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։