Չորեքշաբթի, 13 նոյեմբերի

15-ամյա Ռաշիդը աշխատում է՝ մորն ու հիվանդ եղբորը խնամելու համար




Առաջին անգամ էի լսում, որ գյուղում կարող է հանրակացարան լինել: Բայց Արմավիրի մարզի Լուկաշին գյուղում ինձ ուղեկցեցին հանրակացարան, որտեղ մեծ մասամբ ապրում են փախստականներ ու անապահով ընտանիքներ: Գյուղի դպրոցի փոխտնօրենն ասաց, որ անպայման այցելեմ Գևորգյաններին. «Հիվանդ մայրը մենակ երկու երեխա է պահում. գոնե բարի մարդիկ կգտնվեն»:

Անցա հանրակացարանի քարուքանդ, մութ միջանցքներով մինչև հասա Գևորգյանների սենյակի մոտ: Միակ սենյակը վարագույրով կիսված էր երկու մասի: Գետնին նստած կինը, ինձ տեսնելով, փորձեց ոտքի կանգնել. «Թելեր էի ման գալիս, ձմեռ ա գալիս, գուլպա եմ ուզում գործեմ, համ էլ պատվերներ եմ անում… համեցե՛ք»:

Ռուզաննա Գևորգյանը 36 տարեկան է, ծնունդով Վանաձորից է: Պատմեց, որ շուտ է կորցրել մորը, 17 տարեկանում ամուսնացել, ապրել են Ռուսաստանում, աշխատել է ամուսնուն հավասար, բայց 13 տարի նրա հետ ապրելուց հետո մի գիշերվա մեջ փախել է ամուսնուց՝ փրկելով երկու որիների ու իր կյանքը: Բայց հատուցել է առողջությամբ: Ռուզաննան տառապում է էպիլեպսիայով, ամեն օր ընդունեում է Կարբամազեպինի հաբեր, 2-րդ կարգի հաշմանդամ է, նրան անհրաժեշտ է լիարժեք բժշկական զննում:

«Էրեխեքիս հոր հետ ապրում էի ծեծի մեջ՝ նամուսի գերի: Ամեն ծանր աշխատանք արել եմ` վայրի սխտոր եմ հավաքել, ծախել, կով եմ մորթել: Բայց էրեխեքիս հերը խմում էր ու էնքան էր խփում գլխիս, որ հեմատոմաներ եղան ուղեղիս մեջ: Ողնաշարս էլ մի կողմից: Արդեն մի քանի տարի դժվար եմ քայլում՝ չալիկի ումուդին, բայց կարևորը՝ էրեխեքս առողջ լինեն, ուրիշ բան չեմ ուզում»,- ասում էր հազիվ ոտքերը շարժող կինն ու գոհունակություն հայտնում Աստծուց ու բարի մարդկանցից, ովքեր իրենց են տվել այդ կացարանը:

Այս երեք հոգանոց ընտանիքում երկուսը՝ մայրն ու կրտսեր որդին՝ 9 տարեկան Պավելը հաշմանդամներ են: Այս ամսվանից Պավելը նույնպես ստանալու է հաշմանդամության թոշակ՝ 19.500 դրամ: Նա ունի երիկամային խնդիրներ, հեռատեսություն, մտավոր զարգացման դանդաղում:

Փաստորեն Գևորգյանների ընտանիքը գոյատևում է 30.000 դրամ անապահովության նպաստով ու հաշմանդամության թոշակներով: Դաշտերում տարբեր վարձու աշխատանքներ է անում նաև Ռուզաննայի մեծ տղան`15-ամյա Ռաշիդը, որ գումար ունենա հիվանդ մորն ու փոքր եղբորը խնամելու համար:

Իմ այցելության սկզբում Ռաշիդը տանը չէր, գնացել էր պոմիդոր հավաքելու, բայց գալուն պես ասաց, որ հարևանին է օգնել ու գումար չի վերցնի աշխատանքի դիմաց:

«Լինում են օրեր, որ դասերս գիշերը 12-ին եմ վերջացնում, լինում են օրեր, որ ընդհանրապես չեմ կարում դպրոց գնամ գործի պատճառով: Մտածում եմ` ավելի պետքական ա փող աշխատեմ»,- ասում է Ռաշիդը ու հուզվում:

Չգիտեմ` անջատեմ տեսախցիկը, թե շարունակեմ նկարահանումը: Տեսածս իրականությունից Ռաշիդի անմանկություն առօրյայի մասին լսելուց հարցերս էլ են ուշանում: Մեր զրույցի ամբողջ ընթացքում չտեսա Ռաշիդի ժպիտը, փոխարենը տեսա անսահման տխրություն:              

Ռուզաննայի ավագ որդին դասերն անելու ու խաղալու փոխարեն ստիպված է տուն մաքրել, ավլել հատակը, մորն օգնել լվացք անելիս, առավոտյան, երբ 2 ժամ ջուր են տալիս, հավաքել ջրերը, գումար աշխատել: Նա պատմեց, որ ամեն գործ էլ անում է. «Կաղամբ ենք կտրում, բարձում, խոտ հավաքում, բանջարեղեն ու միրգ քաղում, հող մշակում»,- ասում է ժամանակից շուտ մեծացած ու տղամարդ դարձած Ռաշիդը:

Ռաշիդն ունի երազանքներ` լավ սովորել ու դառնալ ծրագրավորող, որ մորն ու եղբորը իր աշխատած գումարով կարողանա լավ պահել: 15 տարեկան տղան իր աշխատած 20.000 դրամ գումարով կարողացել է մի հին համակարգիչ գնել, որը հիմա չի աշխատում: Գևորգյանների սենյակում չկա նաև անհրաժեշտ գույք, լվացքի մեքենա, սառնարան, բայց Ռուզաննան ու երեխաները համակերպվում են, փառք տալիս Աստծուն, որ միասին են: 


Գլխավոր էջ



Մեկնաբանություններ (7)
1. Գայանե19:57 - 9 հոկտեմբերի, 2015
Հարգելի' Զարուհի, ինչպե՞ս կարող եմ կապվել Ռաշիդի հետ:
2. Karina07:00 - 10 հոկտեմբերի, 2015
Я бы хотела ему помочь
3. Զարուհի10:24 - 10 հոկտեմբերի, 2015
Հարգելի Գայանե, ահա Ռաշիդի հեռախոսահամարը` 095 25 07 79 Շնորհակալություն արձագանքի համար:
4. Vahe01:55 - 21 հոկտեմբերի, 2015
Hargeli hetq.am latinatar em grum zut texnikakan patcharnerov. Es txain notebook em uzum nvirel. Xndrum em voreve kontakt uxarkeq mailis. U idep xndrium em iroq tekuz latinatar gracs chtpagreq. Zut uzum em ognel. Shnorhakalutyun
5. Արմինե17:12 - 25 նոյեմբերի, 2015
Հարգելի Զարուհի, ինձ անչափ հուզել է այս պատանին, եթե կարելի է խնդրում եմ նրանից որևէ կոնտակտ , լավագուն դեպքում հասցեն, իհարկե, եթե հայտնի է , փոխանցել մայլիս: Նախորոք շնորհակալ եմ:
6. Զարուհի12:08 - 29 նոյեմբերի, 2015
Հարգելի քաղաքացիներ, շնորհակալություն արձագանքների համար: Ռուզաննա Գևորգյանի ու նրա երկու երեխաների մասին այս հոդված հրապարակելուց հետո շատ մարդիկ, կազմակերպություններ արձագանքեցին, օգնեցին Ռուզաննային, 15-ամյա Ռաշիդին ու նրա եղբորը` 9-ամյա Պավելին, այդ թվում և «Օգնենք կարիքավոր ընտանիքներին» ՀԿ-ն, Արմավիրի մարզպետարանի պաշտոնյաները: Մի օտարերկրացի կին ցանկություն է հայտնել ապահովել Գևորգյաններին բնակարանով ու խնդրել է Արմավիր քաղաքում գտնել հարմար բնակարան` ցանկալի է առաջին հարկում, որ Ռուզաննային հեշտ լինի տեղաշարժվել: Նա նշել է նաև բնակարանին տրամադրվելիք օպտիմալ գինն իր համար` 10-12.000 ԱՄՆ դոլարի սահմաններում:Մեկ ամիս է մենակ փորձում եմ լավ տարբերակ գտնել, բայց չի ստացվում, դա է պատճառը, որ որոշեցի հրապարակել նաև այստեղ: Գրել եմ նաև Արմավիրի մարզպետարանի էջում: Խնդրում եմ միասին գտնել հարմար տարբերակ, որպեսզի Ռուզաննան ու իր երեխաները Ամանորը նշեն նոր, տաք ու հարմար տանը: Խնդրում եմ հարմար տարբերակներ լինելու դեպքում արձագանքել` գրելով մեզ և ուղարկելով բնակարանների լուսանկարները: Ռուզաննային կարող եք զանգահարել այս համարներով. 094 516825, 095 250779, 094 966074
7. Արմինե19:16 - 3 դեկտեմբերի, 2015
Բարև հարգելի Զարուհի. Շնորհակալ եմ պատասխանի համար: Ճիշտն ասած ես համացանցում փորձեցի փնտրել բնակարաններ, բայց Արմավիր քաղաքում չեմ գտնում: Բնակարաններ կային Արմավիր մարզի տարբեր մասերում, եթե հետաքրքրում է կարող եմ ուղարկել էջերը, որտեղ կան նաև լուսանկարներ տվյալ բնակարաններից:
Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ
Ամենա

Մեկնաբանված

Կարդացված