ՈՒրբաթ, 15 նոյեմբերի

Փայլակ Հայրապետյան. «Ինձ խաբել են խաչագողերը»



«Ես, որ գնացի Աշոտենց տուն, դրված էր սբ. Սարգսի մեծ խաչը, Կճոյանի նկարը, մոմ վառելու տեղեր: Էս պատմությունն ինձ հիշեցնում է «Խաչագողի հիշատակարանը»: Ինձ խաբել են խաչագողերը…»,- «Օֆշորային» անունը ստացած գործով տուժող ճանաչված գործարար Փայլակ Հայրապետյանն այսօրվա դատական նիստին շարունակեց պատասխանել կողմերի հարցերին:

Նա ևս մեկ անգամ շեշտեց, որ նախկինում չի ճանաչել ամբաստանյալի աթոռին նստած Աշոտ Սուքիասյանին, այլ վստահել է հայրենի կառավարությանը, նախարարությանը, դա է եղել պատճառը, որ որոշել է «Ամերիաբանկ»-ում գրավադրել իր գույքը, 12 մլն դոլարի վարկ վերցնել: Ըստ բանկի կողմից կազմված բիզնես ծրագրի, Աշոտ Սուքիասյանը Աֆրիկայի Սիեռա Լեոնե պետությունից՝ իր հանքերից պետք է ոսկու ու ադամանդի հումք մատակարարեր Հայաստանին: Արդյունքում՝ 3 տարի անց Հայաստանում կբացվեր 10.000 աշխատատեղ: Սակայն 5 ամիս անց, ըստ գործարար Փայլակ Հայրապետյանի, հասկացել է, որ խաբված է:

-Ի՞նչ հիմք ունեք դա ասելու համար,-հարցրեց ամբաստանյալի փաստաբան Յուրա Խաչատրյանը:

- Իմ ամբողջ ունեցվածքը վերցրել են, էլ ի՞նչ հիմք,- պատասխանեց Փայլակ Հայրապետյանը,- մտել եմ իր հաշվապահի մոտ, ասել եմ, ա՛յ հաշվապահ, ո՞ւր եք ուղարկել իմ փողերը: Թղթեր շպրտեց դիմացս, ոնց որ շան առաջ շպրտեին:

Փաստաբան Խաչատրյանը հարցրեց նաև չի պահանջել արդյոք տուժողը, որպեսզի Աշոտ Սուքիասյանը փաստաթղթեր ցույց տա իր հանքերի օրինականության մասին. «Կարիք չեմ տեսել, քննարկումը նախարարի հետ էր»,-պատասխանեց տուժող գործարարը:

- Ընդունո՞ւմ եք, որ էմոցիոնալ ընդունեցիք ներդրումների առաջարկը, բայց որևէ պայմանագիր չկնքեցի՞ք,-հարցրեց դատավորը:

- Ո՛չ, իրավաբան ունեի, նա աշխատում էր իրենց հետ, բիզնես ծրագրի կազմմանը ես չեմ մասնակցել,-պատասխանեց Փայլակ Հայրապետյանը:

Հարցեր տվեց նաև Աշոտ Սուքիասյանը: Ասաց, որ 2012- ի հոկտեմբերին Փայլակ Հայրապետյանը ռուսերենով իրեն նամակ է գրել, որ եթե իր ամբողջ ունեցվածքը չգրանցի Հայրապետյանի անունով, ապա վատ կլինի, եթե համաձայնի, իրեն այլևս չեն մեղադրի:

-Եթե որևէ ունեցվածք չունեի, ինչպես ասում եք, ի՞նչ պիտի գրանցեի:

Փայլակ Հայրապետյանի շահերի ներկայացուցիչը պնդեց, որ այդպիսի նամակ եղել է. «Հանդիպել ենք Աշոտի կաբինետում, խոսք էր գնում 10-15 տոկոսի մասին, ինքն ասաց, որ անգամ 25 տոկոսը կարող է տալ: Հայրապետյանին «հայրիկով» էր դիմում: Բայց ուզում էինք համոզվել, թե ինչ ունի: Էդպես էլ ոչինչ ցույց չտվեց»: Սակայն Աշոտ Սուքիասյանն ասաց, որ իրենք չեն ցանկացել որևէ բան նայել: Հետո էլ ասաց, որ գործի ավարտից հետո մի ֆիլմ պիտի նկարի, բայց չգիտի, թե ով կկարողանա խաղալ Ձեր դերը»: 

- 32 հատորում մի տեղ չկա, որտեղ նշված լինի, որ Դուք հանք ունենաք Ձեր անունով,- ասաց դատավորը:

- 4-րդ հատորում նշված է 66 տոկոսի մասին,-պատասխանեց ամբաստանյալը:

Դատավոր Վարդան Գրիգորյանը հարցրեց, թե ո՞վ է որոշել, որ 12 միլիոն դոլար է պետք ներդնել: Փայլակ Հայրապետյանը պատասխանեց՝ էկոնոմիկայի նախկին նախարար Ներես Երիցյանը. «Նա շատ հարցերում է ինձ «քաշել»:

Տուժողը մեկ անգամ ևս ընդգծեց, որ իր ունեցվածքի ոչնչացման հարցում ամենամեծ մեղավորներից են նաև նախկին վարչապետ Տիգրան Սարգսյանն ու արքեպիսկոպոս Նավասարդ Կճոյանը:

- Բազմիցս եք նշում Տիգրան Սարգսյանի անունը, ի՞նչ գործ եք նրա հետ ունեցել,-հարցրեց դատավորը:

- Եթե նախարարներն ինձ խաբել են, հենց նա է պատասխանտու դրա համար: 

Այսպիսով ավարտվեց Փայլակ Հայրապետյանի հարցաքննությունը: Հաջորդ նիստին՝ օգոստոսի 6-ին, ցուցմունք կտա մյուս տուժողը: 

Հիշեցնենք, որ թեև Փայլակ Հայրապետյանը բազմիցս նշել է իր ունեզրկման մեղավորների անունները, այդուհանդերձ գործով միակ մեղադրյալը Աշոտ Սուքիասյանն է։ Նա մեղադրվում է խարդախությամբ ուրիշի առանձնապես խոշոր չափերով գույքի նկատմամբ իրավունք ձեռք բերելու, հանցավոր ճանապարհով ստացված առանձնապես խոշոր չափերով եկամուտները օրինականացնելու, չարամտորեն առանձնապես խոշոր չափերով հարկեր, տուրքեր և պարտադիր այլ վճարումներ կատարելուց խուսափելու մեջ: Առաջադրված մեղադրանքում նա իրեն մեղավոր չի ճանաչում:

 Իսկ նախկին վարչապետ, ներկայում ԱՄՆ-ում ՀՀ դեսպան Տիգրան Սարգսյանի մասով գործն առանձնացվել է և դեռ նախաքննության փուլում է: Փայլակ Հայրապետյանը պնդում է, որ Հայաստանում ադամանդագործությունն ու ոսկերչությունը զարգացնելու, նոր աշխատատեղեր ստեղծելու նպատակով իր կողմից գրավադրած 12 մլն դոլարը չի ծառայել նպատակին, փոխարենը նախ փոխանցվել է կիպրոսյան օֆշորային գոտում գտնվող մի քանի ընկերությունների, այդ թվում՝ Wlispera Holdings Limited-ին: Ըստ «Հետքի» կատարած հետաքննության պարզվել է, որ այդ ընկերության բաժնետերերն են նախկին վարչապետ Տիգրան Սարգսյանը և Սամվել Կճոյանը: 


Գլխավոր էջ



Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ
Ամենա

Մեկնաբանված

Կարդացված