Երկուշաբթի, 09 դեկտեմբերի

Իշխանավորները օժանդակում են Ջավախքը հայաթափելու քաղաքականությանը



Հայաստանի Հանրապետության քաղաքացիներին պատկանող «վրացական պետհամարանիշներով ավտոմեքենաների» հարցի շուրջ վերջերս ծավալված աղմուկի ու քաղաքացիական պայքարի ֆոնին` միգուցե աննկատ մնաց Վրաստանի քաղաքացիներին պատկանող վրացական պետհամարանիշներով ավտոմեքենաների առնչությամբ ՀՀ իշխանությունների ընդունած որոշումները, որոնք հիմնականում ուղղված են Հայաստանի Հանրապետություն պարբերաբար այցելող Վրաստանի ազգությամբ հայ քաղաքացիների շահերի և իրավունքների դեմ։ Տվյալ որոշումներով Վրաստանի քաղաքացիներին պատկանող վրացական պետհամարանիշներով ավտոմեքենաների և հետևաբար նաև վարորդների համար ՀՀ-ում գտնվելու մեկ անգամվա ժամկետը կրճատվում է, դառնալով առավելագույնը 15 օր, իսկ ՀՀ-ում գտնվելու տարեկան առավելագույն ժամկետը սահմանափակվում է՝ մինչև 90 օր: Նույն ավտոմեքենաների համար մտցվել է նաև պարտադիր ապահովագրման համակարգ` մեկ ամսվա համար 6.000 ՀՀ դրամ և մեկ տարվա համար 32.000 ՀՀ դրամ վճարներով: Կարիք չկա տիրապետել պետական գաղտնի տվյալների, հաստատելու համար, որ Վրաստան-Հայաստանի Հանրապետություն պետական սահմանը իրենց ավտոմեքենաներով հատող Վրաստանի քաղաքացիների գերակշիռ մեծամասնությունը մեր հայրենակիցներն են, հատկապես ջավախահայերը, որոնք անթիվ առնչություններ ունեն ՀՀ-Ի ԵՎ ԱՅՍՏԵՂ ԲՆԱԿՎՈՂ ԻՐԵՆՑ ՀԱՅՐԵՆԱԿԻՑՆԵՐԻ ՀԵՏ: Բացի այդ, այս նոր կանոնների ուժի մեջ մտնելուց ի վեր, սահմանի վրա առաջանում են հերթեր, որի հետևանքով ավտոմեքենաներում գտնվող ուղևորները ստիպված տեղում անցկացնում են առնվազն մեկ ժամ, ի հաշիվ իրենց համբերության և առողջության: Տրամաբանությունից ամբողջովին զուրկ և բացարձակապես աններելի այս որոշումները միայն խորացնում են մեր հայրենակիցների հիասթափությունը «մայր պետությունից» և նպաստում վրաց հասարակության հետ «ինտեգրվելու» վրաց իշխանությունների հետապնդած քաղաքականությանը: ՀՀ իշխանավորները հերթական անգամ հաստատում են, որ ոչ միայն անտեսում են ջավախահայության առջև կանգնած և լուծման սպասող խնդիրները, այլև ակտիվորեն օժանդակում են ջավախահայությանը Մայր Հայրենիքից անջատելու և վերջին հաշվով Ջավախքը հայաթափելու վրաց իշխանությունների նպատակասլաց և հետևողական քաղաքականությանը: ՀՀ ներկա իշխանությունների կողմից հակապետական, հակազգային և հակաժողովրդական քայլերի հաճախակիության ակնհայտ արագացումը միայն ընդգծում է այս իշխանավորներից ձերբազատվելու անհետաձգելիության անհրաժեշտությունը: «Սարդարապատ» շարժման նախաձեռնող խումբ

Գլխավոր էջ


Տես նաև՝

ավելին



Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ
Ամենա

Մեկնաբանված

Կարդացված