Երկուշաբթի, 11 նոյեմբերի

«Կռվի դաշտում կարևորը համարձակությունն է, ոչ թե ուժը»



«Ցեղասպանություն տեսած ժողովրդի արյան մեջ միշտ կա ցասում, ընդվզում, ես միշտ ասում եմ` հավ ե՞նք, որ մեզ մորթեն: Այդ ոգին էր, որ մեզ բոլորիս ոտքի հանեց»,- այսօր «Հայելի» ակումբում տեղի ունեցած ասուլիսի ժամանակ ասաց Ազատամարտի վետերանների միության նախագահ, «Սասունցի Դավիթ» ջոկատի հիմնադիր Համլետ Հովսեփյանը: Նա պատմեց, որ արցախյան ազատամարտի օրերին թողել է իրավաբանի գործը և գնացել կռվի դաշտ: Բաքվի, Սումգայիթի դեպքերից հետո, երբ հավաքագրում էին մարդկանց, մեծ հանրահավաք էր հրավիրվել, ասում էին` պետք է զենքի դիմել: Դրանից հետո Համլետ Հովսեփյանը ձեռնամուխ է եղել հասարակական կազմակերպության ստեղծմանը`հույս ունենալով, որ կարող են նաև զինել մարդկանց: «Սասունցի Դավիթ» ջոկատի հիմնադիրը նշում է, որ օր օրի կամավորները շատանում էին: «Սասունցի Դավիթ» ջոկատի 20 ամյակը լրացավ հունվարի 13-ին: «Միգուցե մենք այն ժամանակ հնարավորություն ունեինք Նախիջևանը ետ բերելու: Հերոսական ազգային ոգի կար»,- պատմում է Համլետ Հովսեփյանը: Մյուս բանախոսը` «Արաբո» ջոկատի հրամանատար, «Արաբո» հ/կ-ի նախագահ Մանվել Եղիազարյանը, պատմում է, որ դեռ մանկուց սիրում էր ընթերցել հայ ժողովրդի պատմությունը և անընդհատ իրեն հարց էր տալիս` համարձակությո՞ւնն է կարևոր, թե՞ ուժը` հաղթանակի հասնելու համար: «Ես վստահեցնում եմ, որ 1915թ մենք երևի համարձակություն չենք ունեցել:Մենք պարտավոր էինք ապացուցելու, որ մեր ժողովրդին ոչ ոք չի կարող ծեծել և սպանել: Ու սկսեցինք ջոկատներ կազմել»,- պատմում է «Արաբո» ջոկատի հրամանատարը: Ջոկատներ կազմելով և կամավորներ հավաքելով` ազատամարտիկները սկսում են իրենց կռիվները: «Հետո մենք հասկացանք, որ կռվի դաշտում կարևորը համարձակությունն է և ոչ թե ուժը: Այդ համարձակությունը մեր մեջ ամրապնդվեց, և մենք ապացուցեցինք, որ մենք մորթվող ժողովուրդ չենք, այլ հաղթող»: «Արաբո» ջոկատը ամենամեծն էր` ավելի քան 1780 կամավոր, որոնցից զոհվեց 100-ը: «Սասունցի Դավիթ» ջոկատի զինվոր Աշոտ Աբրահամյանը հիշեց իրենց ջոկատի կազմավորումը և պատմեց, որ բոլորը ճանաչում էին Համլետ Հովսեփյանին և «բոլորը կանգնեցին նրա մեջքին, հավաքվեցին ու գնացին պայքարի»: Աշոտ Աբրահամյանը նշեց, որ եթե մարդը մտածելով է գնում, իր համար հետաքրքիր չէ` ով ինչ է շահում, ինչ կորցնում. «Ես եղել եմ սվարչիկ և մինչև հիմա էլ ես իմ գործն են անում ու քիթս ուրիշի գործերի մեջ չեմ մտցրել, ոչ թե ելնեն կանգնեն, գոռան, դոշ ծեծեն, թե ես եմ արել»,- նշեց «Սասունցի Դավիթ» ջոկատի կամավորը: «Աշոտը քայլող հերոս է մեր կողքին, և ունենք այդպիսի շատ տղաներ, որոնց ձայնը ոչ մի անգամ չեք լսի»,- նշեց Համլետ Հովսեփյանը:

Գլխավոր էջ


Տես նաև՝

ավելին



Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ
Ամենա

Մեկնաբանված

Կարդացված