Կիրակի, 20 հոկտեմբերի

Վիտալի Բալասանյան. «Ռոբերտ Քոչարյանի՝ ՀՀ տեղափոխվելուց հետո ԼՂՀ իշխանությունները վախեցան պատասխանատվություն ստանձնել ղարաբաղյան հարցում»



Արցախի նախագահի ընտրություններին իր թեկնածությունն է առաջադրել նաև Վիտալի Բալասանյանը, ով հայտնի է թե որպես ռազմական, թե քաղաքական գործիչ: Բալասանյանը մեզ հետ հարցազրույցում քսանամյա հեռվից խոսում է ԼՂՀ զինված ուժերի ձևավորման մասին. «Կամավորական ջոկատների կազմավորման առաջին իսկ օրվանից հրատապ հարց էր դարձել Ղարաբաղի տարածքում համախմբել բոլոր ջոկատներին և դնել մեկ կառույցի ներքո: Առաջին քայլը Ինքնապաշտպանական ուժերի կոմիտեի ձևավորումն էր: Դրան հաջորդեց Պաշտպանության պետական կոմիտեի ձևավորումը, որի ենթակայության տակ դրվեցին զինված ուժերը և քաղաքացիական բոլոր կառույցները: Մենք առաջին հաջողությունները գրանցեցինք այդ օրվանից: Ինքնապաշտպանական կոմիտեի նախագահ նշանակվեց Սերժ Սարգսյանը, իսկ Պաշտպանության պետական կոմիտեի ղեկավար ընտրվեց Ռոբերտ Քոչարյանը: Թե զինված ուժերը, թե քաղաքացիական կառույցներն արդեն իսկ սկսեցին գործել կանոնավոր: Հետադարձ հայացք գցելով այդ օրերին՝ գտնում եմ, որ դա էր մեր փրկության և հաղթանակների գրավականը: Կար մի կառույց, որը շատ մեծ պատասխանատվությամբ այդ լուծը վերցրեց իր վրա: Դա օրհասական պահանջ էր: Զինված ուժերը առանց խառնվելու քաղաքական կյանքին` կատարում էին իրենց առջև դրված մարտական խնդիրները` թե պաշտպանողական, թե հարձակվողական բնույթ կրող մարտերում»:

Արցախի պաշտպանության նախարարի նախկին տեղակալն ու ԼՂՀ ԱԺ պատգամավորը հարցազրույցում անդրադարձավ բանակցային գործընթացից ԼՂՀ դուրս մնալուն:

«1994 թ. մայիսյան զինադադարից հետո ողջ բնակչությունը լծվեց պետականաշինության գործին, սկսեցինք բուռն կերպով աշխատել բոլոր ուղղություններով: Արցախը հանդես էր գալիս որպես լիիրավ կողմ բանակցություններում, բայց ցավոք այդ շրջանը կարճ տևեց: Ռոբերտ Քոչարյանի՝ Հայաստանի Հանրապետություն տեղափոխվելուց հետո ԼՂՀ իշխանությունները վախեցան պատասխանատվություն ստանձնել ղարաբաղյան հարցում և նրանց անգործության հետևանքով Ղարաբաղը դուրս մնաց բանակցային գործընթացից: Այնուհետև ՀՀ իշխանությունները ստիպված եղան այդ ծանր բեռը վերցնել իրենց վրա, ինչը շատ մեծ հարված էր ՀՀ-ի համար: Բանակցություններից Արցախի դուրս մնալու պատասխանատվությունն ընկնում է ԼՂՀ իշխանությունների վրա: Այժմ էլ նույն անպատասխանատու վիճակը շարունակվում է: Առ այսօր ԼՂՀ իշխանությունների կողմից չկա մշակված որևէ փաստաթուղթ, որով պետք է առաջնորդվենք և ներկայացնենք միջազգային հանրությանը Ղարաբաղի հիմնահարցի լուծման վերաբերյալ մեր մոտեցումները»:

Իր ծրագրային դրույթների մասին Վիտալի Բալասանյանը խոստացավ խոսել քարոզարշավի ընթացքում: Դեռևս ձեռնպահ մնաց նաև իր թիմի մասին խոսալուց: Մեր հարցին, թե լուրեր են տարածվում, որ հայտնի բարերար Լևոն Հայրապետյանը առաջիկա նախագահական ընտրություններում իրեն է աջակցելու, պատասխանեց. «Ես և Լևոն Հայրապետյանն ունենք ջերմ հարաբերություններ, հարգում եմ այդ մարդու տեսակը, ինքը ի ծնե է բարերար և մեծ աշխատանքներ է տարել Արցախի և ՀՀ-ի տարբեր բնակավայրերում ենթակառուցվածքների, աշխատատեղերի ստեղծման ուղղությամբ: Ամենից մեծ աշխատանքն, իհարկե, արված է Վանք գյուղում և հարակից տարածքներում, ընդհուպ պլանավորված է կադետական դպրոցի հիմնումը: Դա մեծ նշանակություն կունենա ապագա սերնդի ռազմահայրենասիրական դաստիարակության գործում: Ես ցավում եմ, որ Հայրապետյանի ֆինանսավորած շատ ծրագրեր ինչ-ինչ պատճառներով այժմ դադարեցված են: Ես շատ հպարտ եմ, որ իմ շրջապատում կան նմանատիպ մարդիկ: Իսկ ինչ վերաբերում է Լևոն Հայրապետյանի ինձ սատարելուն, պետք է նշել, որ Հայրապետյանը ՌԴ քաղաքացի է և օրենքով արգելված է մեր ներքաղաքական կյանքին օտարերկրյա քաղաքացու մասնակցությունը»:

Հիշեցնենք, որ ԼՂՀ նախագահի թեկնածուներն չորսն են` գործող նախագահ Բակո Սահակյանը, Վիտալի Բալասանյանը, ՀՀ պետական ագրարային համալսարանի Ստեփանակերտի մասնաճյուղի փոխտնօրեն Արկադի Սողոմոնյանը և ԼՂՀ ԱԺ ընդհանուր բաժնի նախկին պետ Վալերի Խաչատրյանը: ԼՂՀ նախագահի ընտրությունները տեղի կունենան հուլիսի 19-ին, իսկ թեկնածուների գրանցումը տեղի կունենա մայիսի 30-ից մինչև հունիսի 19-ը, որից հետո կմեկնարկի նախընտրական քարոզարշավը:

Լուս.՝ Վ. Բալասանյանի ֆեյսբուքյան էջից


Գլխավոր էջ



Մեկնաբանություններ (1)
1. Վարազ Սյունի (Ամստերդամ)19:46 - 30 մայիսի, 2012
Համաձայն եմ: Ես հենց այնպես չեմ Արցախի իշխանություններին այդքան քննադատել/քննադատում. կամ ՊԱՏԱՆԴ են խաղում,կամ էլ ՔՆԱԾ են ձևացած: Միայն սեզոնին են «զարթնում»- խուրջինները կապած Ամերիկաներում ու Բեյրութներում ՓՈՂ ՈՐՍԱԼՈՒ: Ու մեկումեջ էլ ուրիշի փողերով կառուցված օբյեկտի առաջ կարմիր ժապավեն են կտրում ու իրար գովում:..............................................................Պարոն Բակո Սահակյան - մինչև հիմա որևէ քաղաքական ՆՎԱՃՈՒՄ ունեցել եք ԱՐՑԱԽԻ համար? Ես ՉԵՄ տեսել:.............................................................. ԲՈԼՈՐԸ քննարկում/բանակցում են Արցախի ճակատագրի մասին,ԲԱՑԻ ԱՐՑԱԽԸ: Այսպես որ շարունակեք,հաստատ ձեր 'անկախության ճանաչումը' արծաթե սկութեղի վրա հրամցնելու են ձեզ...բայց արդեն Խանքենդիում:
Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ
Ամենա

Մեկնաբանված

Կարդացված