ՈՒրբաթ, 18 հոկտեմբերի

Ապրում ենք խաչագողերի, դիակապուտների ու անբարոյականության սերմնացանների կողքին



Ոստիկանությունը երեկ հաղորդագրություն տարածեց, որ Կենտրոնական գերեզմանատան (Թոխմախի գերեզմանոց) քաղաքային պանթեոնից գողացել են Դերենիկ Դեմիրճյանի շիրմաքարի կիսանդրին:

«Կատարվածը պետք է որակենք իբրեւ սրբապղծություն»,- այսօրվա ասուլիսում հայտարարեց Հայաստանի գրողների միության նախագահ Լեւոն Անանյանը` հավելելով, որ պատասխանատուն Էրեբունու ոստիկանությունն է, բայց նաեւ նաեւ նշեց, որ հնարավոր չէ այդ մեծ գերեզմանատան ամեն շիրիմի կողքին մի պահակ կանգնեցնել: Նա հիշեց Րաֆֆու «Խաչագողի հիշատակարանը», որտեղ դիպուկ ներկայացվում են այս ամենի դրդապատճառները:

«Այն ժամանակ, երբ հասարակությունը դառնում է այդքան անտարբեր իր շրջապատի հանդեպ, նեխած ջրի երես է դուրս գալիս մրուրը: Այսօր այնքան են մեր բարոյական արժեքները խաթարվել, այնքան ենք մենք դարձել կրավորական, անտարբեր մեր, միջավայրի հանդեպ, որ տեսնում ենք այդ նեխած ջրի մրուրը, փառակալումը, մեր խիղճը, մեր արժեքային հմակարգը,- նշեց Անանյանը: Հասարակության վերաբերմունքը, ըստ նրա, խնդրի մի կողմն է: Երկրորդը` գերեզմանատներից մետաղյա պարիսպների, կիսանդրիների կողոպուտը խոսում է այն մասին, որ «սա մի անհատի գործ չէ, սա ինչ-որ բանդա է, որը շատ հմտորեն ծրագրում է: Ոստիկանությունն ունի միջոցներ ու հնարավորություններ, որպեսզի արմատախիլ անի այդ երեւույթը»:

Անանյանը վստահ է նաեւ, որ Դեմիրճյանի նկատմամբ մեր հասարակությունը չունի այն համարժեք գնահատականը եւ մեծարանքը, որին նա արժանի է: «Այսօր մենք պիտի խոսենք այն մասին, թե 1956-ին ինչու Դեմիրճյանը չգնահատվեց ըստ արժանվույն ու իր վերջին հանգրվանը չգտավ Կոմիտասի պանթեոնում,- ասում է ԳՄ նախագահը:- Քաղաքային պանթեոնում տիրող այս անտեր վիճակն էլ մեզ հուշում է, որ մենք պիտի դաս քաղենք ու կազմակերպենք Դեմիրճյանի վերաթաղումը, աճյունը տեղափոխենք Կոմիտասի պանթեոն»:

Լեւոն Անանյանը խաչագողության դեմ պայքարի լավագույն միջոցը համարում է  այդ երեւույթի նկատմամբ անհանդուրժողության մթնոլորտի ձեւավորումը. «Միայն այս դիակապուտները չեն, շուրջբոլորը անբարոյականության սերմնացաններ ենք տեսնում ու շատ հանդուրժողաբար ենք վերաբերվում այդ ամենին: Հասել ենք խաչագողերի հասարակության մակարդակին»:

«Էսօրվա խաչագողերը հայրենիք են գողանում, մեր հայրենիքն այսօր կողոպտվում է բոլոր իմաստներով,- նշեց գրող, հրապարակախոս Հրաչյա Մաթեւոսյանը:- Ամեն մի խուժանության արդեն ներկա ենք լինում: Հայրենիքը կողոպտվեց նաեւ Ռոբերտ Քոչարյանի իշխանության 10-ամյակում ու այսօր շարունակում է կողոպտվել: Մի՞թե սա մեր վերջին հողակտորն է: Լիքը անտեր շիրմիներ կան, որ պղծվում, թալանվում են: Սա մեր ազգային նկարագրին հատուկ չէ, բայց դարերի միջով անցած ազգն այսօր բարոյալքվում է, որովհետեւ ստեղծվել է սարսափելի աղքատների ու սարսափելի հարուստների, թալանչիների հասարակարգ: Գողացողը շատ գիտի՞, թե Վարդանանքը ով է, Դեմիրճյանը ով է, մտածել է, որ գողանալով կարելի է դրանից փող սարքել, օրվա հացը վաստակել: Նա էլ այդպես է գողանում, ինչպես պետական բոլոր այրերն են անում:

Կոմիտասի անվան պանթեոնի մոտ դելիֆինարիա են կառուցում: Սա ազգային խայտառակություն է: Նույն Թոխմախի գերեզմանոցի հերոսների ծառուղուց 30 մ հեռավորության վրա ռեստորան են կառուցել: Ուզում ես փախչել էս գետինը մտած թալանչի իշխանություններից: Պարզապես ավերվող երկիր: Մենք սովորեցնում ենք օտարին, թե ինչպես կարելի է ոչնչացնել Հայաստանի հնությունները»:

Դեմիրճյանի տուն-թանգարանի վարիչ Կարինե Ռաֆայելյանը տեղեկացրեց, որ ըստ գրողի հարազատների` բրոնզե կիսանդրին 300 կգ կկշռեր: Նա նույնպես համոզված է, որ սա ծրագրված գողություն է: Քանի որ իրենց առաջնահերթ խնդիրը եղել է տուն-թանգարանի ոչ բարվոք վիճակը, աճյունի վերաթաղման հարց չեն բարձրացրել, բայց այս դեպքից հետո, քանի որ պետք է շիրմաքարը նորոգվի, Ռաֆայելյանն առաջարկում է միանգամից լուծել նաեւ վերաթաղման հարցը:

Մանրամասները` առաջիկայում


Գլխավոր էջ


Տես նաև՝

ավելին



Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ
Ամենա

Մեկնաբանված

Կարդացված