Շաբաթ, 23 մարտի

Ջրային կոմիտեի տեխնիկական հանձնաժողովը քննարկել է Սևանից հավելյալ ջրառի և ջրամբարների անվտանգության հարցեր



Ջրային տնտեսության պետական կոմիտեն հայտնում է, որ ջրային համակարգերի օգտագործման և պահպանության տեխնիկական հանձնաժողովը մշտապես գործող հանձնաժողով է, ստեղծվել է շուրջ 15 տարի առաջ, կազմում ընդգրկված են ոլորտի փորձառու, վաստակաշատ մասնագետներ, սակայն վերջին տարիներին հանձնաժողովը պարապուրդի էր մատնվել,  անգամ նիստեր չէին գումարվում: Այնինչ, ըստ կանոնադրության, պետք է նիստեր գումարվեն առնվազն 3 ամիսը մեկ, ավելի հաճախ՝ ըստ անհրաժեշտության:

Այսօր, ըստ կոմիտեի հաղորդագրության, արդեն կայացել է հանձնաժողովի երկրորդ նիստը՝ Հովհաննես Թոքմաջյանի նախագահությամբ: Նիստին ներկա է եղել նաև Ջրային կոմիտեի նախագահ Ինեսսա Գաբայանը, որ հանձնաժողովի անդամներին առաջարկել է ակտիվ մասնակցել այս և առաջիկա մյուս քննարկումներին, քանի որ անելիքներն ու ակնկալիքն իրենցից շատ են: «Համատեղ անելիք շատ ունենք,  պետք է կարողանանք առավելագույնս կենտրոնացնել մեր մասնագիտական  փորձն ու ներուժը և ավելի արդյունավետ գործել: Լրջագույն անելիք ունենք մեր ռազմավարական  խնդիրների լուծման, ջրային տնտեսության վարման ճանապարհին»,- ասել է կոմիտեի  նախագահ Ինեսսա Գաբայանը:

Նիստում անդրադարձ է եղել նաև Սևանից հավելյալ ջրառին: Կոմիտեի նախագահը ներկայացրել է փաստացի տվյալներ, պարզաբանել, թե ինչպես է բաշխվել Սևանից վերցվող ջուրը: Օրվա դրությամբ արդեն  իսկ ջրառը կազմել է 195.6 մլն խ/մ: Միջգերատեսչական աշխատանքային խումբը շարունակում է մարզերում հետևել ոռոգման ջրի բաշխման գործընթացին, արձանագրվող թերացումներին հնարավորին արագ լուծումներ ու կարգավորումներ են  տրվում:

«Սևանից ջրառն իրականացվում է խիստ հսկողության պայմաններում: Այդ նպատակով, գիտեք, միջգերատեսչական աշխատանքային խումբ է գործում և մենք գրեթե ամեն օր մարզեր ենք այցելում, տեղում պատկերն ավելի հստակ ենք տեսնում: Այն, որ ոռոգման համակարգը վատ վիճակում է, ակնհայտ է և առաջին հերթին դրանով են պայմանավորված մեծ կորուստները, շուրջ 50 տոկոսի չափով: Համակարգում  իրականացվող արդիականացման ցանկացած աշխատանք ջրամատակարարման բարելավման հետ նաև կորուստներն է նվազեցնում, սակայն դրանք դեռևս շատ քիչ են՝ էապես եղանակ փոխելու համար: Մեր խնդիրն է վերացնել, բացառել մարդկային  գործոնով պայմանավորված կորուստները»,- ասել է կոմիտեի նախագահը:

Օրակարգային հարցերից նիստում անդրադարձ է եղել Ազատի ջրամբարին: Քննարկվել է հատակային ջրթողի վթարային աշխատանքների նախագծային լուծումների ճշգրտման նպատակով՝ մեռյալ (9.2 մլն մ3) ծավալից ոռոգման նպատակով ջրի թողքեր կատարելու (6-7 մլն մ3) նպատակահարմարության հարցը:

Օրակարգում նաև Արփի լճի տեխնիկական վիճակի քննարկումն էր. պատվարի ստորջրյա մասի տեխնիկական վիճակը ճշտելու, հնարավոր ջրամեկուսացման աշխատանքներ իրականացնելու նպատակով՝ առկա ջրի ծավալը Ախուրյանի ջրամբար տեղափոխելու նպատակահարմարության հարցը:

Կարևորելով Ջրօգտագործողների ընկերությունների դերը՝ հանձնաժողովը քննարկել է նաև ՋՕԸ և ՋՕԸՄ կանոնակարգող խորհրդի մասին՝ կառավարության որոշման մեջ փոփոխություններ կատարելու հարցը:


Գլխավոր էջ



Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ
Ամենա

Մեկնաբանված

Կարդացված